Di ni unang higayon nga gisuspenso ni Presidente Rodrigo Duterte ang operasyon sa buhatan sa gobyerno nga gipasanginlan og dagkong kahiwian.
Gisuspenso niya og di lang kausa kondili kaduha ang operasyon sa Philippine National Police (PNP) batok sa ilegal nga drugas human sa pasangil nga naangin ang inosenteng mga biktima apil nang mga bata.
Sa matag higayon nga gipahunong niya ang operasyon sa PNP iyang gitunol ang tahas ngadto sa Philippine Drug Enforcement Agency (PDEA) kansang mga sakop wa ra sa kumingking sa gidaghanon sa kapolisan busa wa kalahutay.
* * *
Kaduha na sab niya hudlata ang Bureau of Customs (BOC): Una, iyang gipasidan-an nga tangtangon ang tanang sibilyan ug pulihan sa kasundalohan; ug ikaduha, iyang gipasidan-an ang 100 ka opisyal ug kawani nga tangtangon sa katungdanan kay nahilambigit sa mga anomaliya.
May nakahunghong tingali sa presidente sa kalapad sa kadaot sa nasudnong ekonomiya kon iyang suspensuhon ang operasyon sa BOC, way mangolekta sa mga buhis sa mga importasyon ug way mohikay sa mga dokumento sa mga kargamento pagsud-gawas sa mga pantalan. Maong kutob lang siya sa abundang mga hudlat.
* * *
Tulo ka adlaw na human niya suspensoha ang tanang sugal nga giduma sa Philippine Charity Sweepstakes Office (PCSO) wa pay klarong katin-awan ang Malakanyang sa mga sukaranan sa kalit niyang lakang:
Wa nganli ang mga opisyal sa PCSO ug ilang kakonsabo sa pribadong sektor nga nanguwarta sa lotto ug ubang sugal;
Wa nganli ang mga kontrata nga nakapa-alkanse sa gobyerno; ug
Wa nganli ang mga kaso ug mga huwes nga iyang giingon nga gimaniobra.
* * *
Sama sa kampanya sa drugas nga gibalik sa PNP nga way kausaban sa mga lagda pagbadlong sa extra-judicial killings (EJKs) ug sa kurakot nga mga opisyal ug kawani sa BOC nga wa makiha, mahimong ipadayon ra gihapong mga sugal sa PCSO nga di ta mahibawo kinsay nangawat, pilay nakawat ug mabawi pa bang mga kinawat.
Sa kasamtangan, makulban sa kaldero ang mga nagsalig sa lotto outlets ug ubang sugalan ug way tabang nga makuha ang 1,500 ka kabos nga pasyente alang sa tambal ug ospital. Hangtod sa sunod nga hugna sa nag-usab-usab nga tuyok sa utok sa presidente.
* * *