Patas lang unta

Ang Department of Interior and Local Government (DILG) moluwat ug usa ka memorandum circular nga magmando sa mga lokal nga kagamhanan sa tibuok nasod sa paghawan ug pagbawi pagbalik sa mga kadalanan ug sidewalk nga adunay mga babag kon ‘obstructions.’ Maguol ang mga gagmay nga vendors kay sila ang una’ng mapagan kn ipatuman na kining kamanduan; magngisi ang mga utility companies nga magpabungol-bungol lang unya sa maong kamanduan.  Patas lang pud unta ang pagpatuman.

Abangan ang susunod

Matud pa ni Cebu City Administrator Atty. Floro Casas, mahatagan gilayon sa business permit ang mga negosyante sulod lamang sa usa (1) ka adlaw bisan kon kulang pa ang ilang papeles apan mopirma una sila og “undertaking” nga ilang kompletohon ang mga rekisitos sulod sa 60 ka adlaw.  Sa kadaghan sa mga negosyante, kinsa ang mosuhid ug unsaon paglutos sa City Hall niadtong dili makatuman sa mga rekisitos paglabay sa 60 ka adlaw? Abangan ang susunod na kabanata!

Mailhan na ang tapolan

Miawhag si Mayor Edgar Labella sa tanan’g Barangay Captain sa pagtabang pagsulbad sa problema sa basura ug sa baha sa ilang tagsa-tagsa ka barangay. Kini nunot usab sa awhag ni Presidente Duterte nga kinahanglan ang mga lokalidad magpabilin nga hinlo ug hapsay.  Maklaro na karon sa katawhan kon kinsa ang mga kapitan nga tapulan ug kon kinsa ang maantigo morason aron matabunan ang ilang kakulangon. Isip-isip!

Usahay ginansya, usahay tabla

Matud pa sa balita, paglabay sa unom ka tuig nga pinaabot, bayaran na sa Capitol ang mga contractor kansang mga proyekto nahuman na ug namatud-an nga dili mga “ghost projects.”  Sa maong kadugayon sa pagpaabot, aduna pa ba kahay ginansiya ang mga contractor sa ilang proyekto? Alang sa mga kontraktor, sige na lang kon walay ganansiya basta di matabla. Ingon niana man gyud kaha ang kinabuhi’ng contractor, usahay makaginansya, usahay dili.

Tuloy ang ligaya

Naglaraw ang Ombudsman nga moluwat og preventive suspension order sa mga kawani sa Bureau of Customs nga mahibaw-an, segun sa pasiuna’ng imbestigasyon, nga adunay nabuhat nga salaod.  Apan ang katawhan dili gihapon matagbaw niining maong kalamboan. Sa kadako ug kalapad sa sindikato diha sa buhatan sa Aduwana, ang dili na nila mabuhat sa sulod, mahimo gihapon nila buhaton sa gawas. Sa tinagalog pa, “Tuloy pa rin ang maligayang araw’!