Sama sa naandan, ang mga tag-iya sa puhonan mao ang nipatigbabaw. Naabtan ang mga anak sa singot og 21 ka tuig sa pagduso sa balaudnon nga mosuway pagtapos sa gikasilagan nga kontraktuwalisasyon, apan gibangilan ra gihapon sa kataposan nga hugna.
Human nakumbinser ang mayoriya sa mga senador ug mga kongresista sa pagpanday sa Security of Tenure Bill, bisan kun ang nakalusot nga mga probisyon mas lasaw kay sa orihinal nga giawhag sa mga mamumuo, nagpapating gihapon ang mga negosyante sa pag-atang sa Malakanyang aron sa pagbanhig ug pagbuno sa balaudnon.
* * *
Mahimong pikatan ang kahugpongan sa mga mamumuo nga nihulagway nga taphaw ang balaudnon.
Kay wa sila matagbaw sa pagpalapad sa mga pagdili sa kontraktuwalisasyon. Ubos sa balaudnon, isipon nga ilegal ang pag-suplay og mga trabahante:
• Kun ang job contractor igo lang nga mo-suplay, mo-rekrut ug mopahimutang og mga trabahante sa kompaniya;
• Kun ang mga trabahante nga gi-suplay sa kontraktor naghimo sa mga gimbuhaton nga direktang nahilambigit sa negosyo sa kompaniya; ug
• Kun ang kompaniya mao ang naghupot sa direktang kontrol ug superbisyon sa mga trabahante nga gi-suplay sa kontraktor.
* * *
Mahimong nakumbinser si Presidente Rodrigo Duterte nga ang pag-insistir sa labor groups sa hingpit nga pagpapas sa kontraktuwalisasyon (nga iyang gisaad sa kampanya sa piniliayng presidensiyal sa 2016) makahimong way kapuslanan sa iyang pagpirma sa balaudnon: Sawayon siya sa mga negosyante ug tungluhon gihapon sa mga mamumuo.
Maong gidapigan sa presidente ang mga negosyante nga makahimo pag-outsource sa mga trabahante kun makapalambo sa ilang operasyon, di makadaot sa mga trabahante, ug bisan direktang nahilambigit sa ilang negosyo.
* * *
O mahimong imposible lang gyod ang pag-balanse sa nagkasungi nga mga interes sa mga negosyante ug mga mamumuo.
Ug atubangan sa kaliboan ug usa niya ka gimbuhaton ug sa nagkapupos nga tagal wa nay panahon ang presidente sa pagpamalandong og dugay.
Maong gipaminaw na lang ang mga kataposan nga nakahunghong niya, ang iyang nag-kurbata nga economic managers nga klarong tua sa mga negosyante nakapusta.
Bahala na ang nangantod nga mga anak sa singot nga, samtang maoy nihatag niya og 85% nga approval rating, di makasayun-sayon og sud-gawas sa Malakanyang aron sa pagpasabot sa ilang kawsa.
* * *