Bisan og unsaon pa og balikas ug bugal-bugal ni Presidente Rodrigo Duterte sa Iceland, nga maoy nipasaka sa resolusyon nga nag-awhag sa pagsusi sa nagkadaghan nga extra-judicial killings (EJKs) sa iyang kampanya batok sa ilegal nga drugas, mapugos siya sa pag-atubang sa imbestigasyon nga gimando sa United Nations Human Rights Council (UNHRC).
Makauuwaw ang kapildehan sa iyang pamunoan sa kalibotanong diplomasiya.
Nakumbinser sa Iceland ang mas daghang mga nasud bisan sa kusganon nga pagsupak sa Pilipinas ug sa kinakusgan nga padrino ni Presidente Duterte, ang China.
* * *
Ang mosunod maoy unod sa resolusyon nga giaprobahan sa UNHRC atol sa ilang tigom sa Geneva:
Nipadayag og kabalaka sa mga pagpanghulga ug personal nga mga atake ni Presidente Duterte batok sa mga imbestigador sa UN;
Nihangop sa pasalig sa Malakanyang nga atubangon ang independenteng imbestigasyon sa kahimtang sa tawhanong katungod sa nasud;
Niawhag sa Pilipinas pagbadlong sa EJKs ug pagsilot sa mga responsable sa laktod nga mga patay; ug
Niawhag sa pamunoang Duterte sa pagpasud sa nasud sa mga opisyal sa UNHCR ug sa di paghudlat nila.
* * *
18 ka nasud ang nipaluyo sa resolusyon: Argentina, Australia, Austria, Bahamas, Bulgaria, Croatia, Czech Republic, Denmark, Fiji, Iceland, Italy, Mexico, Peru, Slovakia, Span, Ukraine, United Kingdom ug Uruguay.
14 ang nisupak: Angola, Bahrain, Cameroon, China, Cuba, Egypt, Eritrea, Hungary, India, Iraq, Philippines, Qatar, Saudi Arabia, Somalia ug Tunisia.
Ug 15 ang ni-abstain: Afghanistan, Bangladesh, Brazil, Burkina Faso, Chile, Congo, Japan, Nepal, Nigeria, Pakistan, Rwanda, Senegal, South Africa ug Togo.
* * *
Gitahasan si UNHCR High Commissioner Michelle Bachelet sa pag-andam og komprehensibo nga taho sa kahimtang sa tawhanong katungod sa Pilipinas.
Mahimong moanhi siya o magpada og mga imbestigador bisan sa pagsupak ni Presidente Duterte.
Unsay mga pagtulon-an nga angayng makat-onan sa presidente ning iyang pagkalukapa sa UNHCR? Di diay mahadlok sa iyang mga insulto ug pasidaan ang kalibotanong mga institusyon ug ubang kanasuran.
Ug tingali panahon nang ilisan si Foreign Affairs Secretary Teddy Boy Locsin og mas takos nga mopatin-aw bisan sa labing makalibog niyang mga sulti mahitungod sa pagpapatay sa gidudahang mga durugista, pagpanggukod sa mga nangahas pagsukwahi niya ug pagpataka og pasangil sa Iceland ug mga imbestigador sa UN.
* * *