Dihang maglikay lang

Hulyo 14, 2019: Ikanapulog-Lima

nga Domingo sulod sa tuig

Mga Pagbasa:  Deut. 30;10-14/Sal. 69

/Col. 1;15-20/Lk. 10;25-37

Kini tingali ang naa sa hunahuna sa pari ug sa levita nga nagdumili paghatag sa ilang tabang sa gibanhigan sa dalan padung sa Jerico. Dunay mga hinungdan kun nganong nagdumili og hatag sa ilang tabang ang maong mga tawo.

Una, tungod kay ang maong sitwasyon maoy gamiton nga kahimanan sa usa ka tulisan aron mamiktima pud sa uban. Ikaduha, hilan ang maong dapit busa peligro kun mohunong ka aron pagtabang.

Ikatulo, ang pari ug ang levita padung sa Jerusalem alang sa ilang tulumanon sa templo ug bawal alang kanila ang dugo. Mao nga wala sila mosuway og hikap man lamang sa biktima kay segun sa mando sa ilang relihiyon kini maoy makapahugaw kanila. Sa laing bahin ang usa ka Samaryanhon bisan pa man sa iyang pagkalahi sa mga Judio ang mihatag sa iyang tawhanong pagpakabana. Sa dihang nihimo og tabang ang maong samaryanhon gipahinumdoman kita nga ang paghimo og maayo is universal.

Apan lahi ang atong panahon karon. Daghanan sa mga tawo karon ang pilian kaayo diha sa paghimo og maayo ngadto sa uban. Daghan sa mga tawo karon ang sigurista para sa ilang kaugalingon aron makalikay sa bisan unsang dili maayong panghitabo o kakuyaw. Mao nga imbes motabang ang mangita og rason aron dili makahimo og bisan unsang lakang sa pagrisgo. Ingon ana ang kadaghanan kanato karon. Daghan ang nahimong tigpakaaron ingnon. Nitabang sila apan wala sila morisgo. Ang maong talan-awon nagdapit kanato sa pagpamalandong ning mosunod:

1. Diha sa pagtabang himoang mas malukpanon kini. Ayaw kini ipasikad sa imong pagsabot o pagbati lamang. Be objective matud pa.

2. Diha sa paghimo og maayo himoa kini sa way pagpaabot og bawos. Ang tawong matinabangon sa uban tawo nga malipayon.

3. Diha sa paghimo og maayo batoni sa gihapon ang pagkamapaubsanon.

4. Ang paghimo og maayo sa uban bisan kun way mapaabot nga bayad o ganti maoy tinud-anay nga diwa sa Kristohanong Kinabuhi.

Unta daghan nato ang mamahimong mga Good Samaritans kay basin na lamang sa ginagmay natong tabang mausab nato ang kalibutan.