Dagyaw!

Usa kini ka Hiligaynon nga pulong nga kon hubaron sa tinagalog bayanihan o sa atong pinulongan tambayayong o kahiusahan.

Gilusad kini nga programa sa Department of Interior and Local Government (DILG) nga gitumong sa panaglambigit sa katawhan lukop nasud.

Ubos niining maong programa, ang katawhan mahatagan na og kahigayonan nga direktang makig-atubang sa mga opisyal sa gobierno pinaagi sa Open Government and Participatory Governance Regional Townhall Meetings nga molanat hangtod sa buwan sa Septiyembre.

Mga sunodsunod nga regional dialogues ang himoon tali sa kagamhanan ug katawhan sa lokal level.

Mamahimong sentro sa diskusyon ang isyu sa panglawas, edukasyon, pabalay, imprastraktura ug anti-corruption efforts.

Ang townhall meetings gitumong usab alang sa mas epektibong reporma sa gobierno.

Nindot kaayo paminawon ang pulong “Bayanihan” tungod kay matod pa walay butang nga dili mahimo basta magkahiusa ug magtinabangay.

Mas labing nindot tan-awon kon mahitabo gyud nga sayon ra nga maduol ug makab-ot sa katawhan ang mga ahensya sa kagamhanan nga direktang maminaw sa mga yangongo aron mahatagan dayon og aksyon.

Maayo unta kon matinuod kini kay basin baya og kutob lang sa papel o pulong ang nakanindot niini apan layo ra kaayo sa realidad.

Hatagan nato og kahigayonan kay basin matinood diay nga sayon na kaayong kab-oton ang kamot sa atong mga opisyal, sayon kuhiton ang ilang dunggan aron seguradong makadungog sa honghong sa katawhan.