EDITORYAL - Klaroha ang limitasyon

Maayo kining tinguha ni Gobernador Gwendolyn Garcia nga pagpatawag sa tanang stakeholders kabahin sa Tañon Strait Protected Seascape aron klaruhon unsa man gyud ang mga bawal ug dili bawal.

Kini tungod kay daghan sa mga gagmay nga mga panagatan ang naglibog kun unsa gyuy dili pwede nilang buhaton didto tungod kay ang uban kanila nakasuway naman nga gidakop tungod kay giingong nakalapas sila sa balaod.

Ang proteksyon sa Tañon Strait usa ka maayong lakang sa gobiyerno pinaagi sa proklamasyon ni kaniadto kanhi presidente Fidel V. Ramos tungod sa overfishing ug mga lakang nga oil exploration sa lugar.

Ang maong dagat nga may gitas-on nga 161 kilometros nga sumpay sa Visayan Sea sa amihanan ngadto sa Bohol Sea sa habagatan, may gilapdon lang nga singko ngadto sa 27 kilometros gikan sa Negros Occidental, Negros Oriental ug Cebu. Matud pa sa mga eksperto naa sa maong dapit ang breeding grounds sa nagkalain-laing mga isda ug mananap sa dagat ug kini maoy kinadak-ang protected seascapes sa nasud karon.

Matud pa sa DENR 14 sa 28 ka mga klase sa giprotektahang species sa dolphins dinhi sa nasud ang makita diha.

Apan samtang tuod importante ang proteksyon sa dapit aron masiguro ang pagsanay ug pagdaghan sa supply sa isda dili lang sa kabisay-an kondili tibuok nasud, angay tingaling klaruhon pagbalik ang mga patakaran nga gipatuman kun unsa ang mga limitasyon ug regulasyon.

Base sa Republic Act 10654 gidili sa mga commercial fishing vessels nga may gibug-atong tulo ka tonelada ang makapangisda sa sud sa 15 kilometro gikan sa baybayon nga gikonsiderar nga municipal waters.

Apan dunay mga mireklamong mga medium scale fishing boats nga gipangsikop.

Kinahanglang klaruhon ang mga patakaran ug ipatuman ang mga probisyon sa RA 10654 sama sa pag-rekord sa mga kuha ug kun asa kini nakuha ug unsa nga matang sa isda ug uban pa.