Padung sa “ATM”

Mga Job Order (JO) workers sa Lapu-Lapu City gikataho nga makadawat og ‘cash incentive’ agi og pabalon kanila sa Mayor. Wala hinuon ikataho kun ang ilang madawat nga pabalon ipaagi ba sa ATM sa bangko, apan pipila ka JO nakaseguro na nga mapunta gihapon sa ATM ang ilang madawat nga kwarta, nga buot ipasabot; “Automatic To Mrs.”

Nawad-an na og interest

Gikataho nga ang mga nadani sa pagbubo og kantidad ngadto sa mga financial investments nga gideklarar sa gobyerno nga ilad wala na mag-apas sa tubo sa ilang kwarta kon di nga mahibalik lang unta ang ilang gipuhonan. Alang kanila, nawad-an na sila og interest sa “interest” sa ilang kwarta.

Baba sa leon o buaya

Naghandum pa ang uban nga namuhonan sa KaPa (Kabus Padatuon Community Ministry) nga mahibalik pa kanila ang ilang gipondar nga puhonan. Padayon sila nga naglaum kay kanunay pa kuno motawag kanila ang “ahente” sa KaPa. Wala hinuon nila matataw kon asa unya nila kobrahon ang ilang nabubo nga puhonan: sa baba ba sa leon o sa baba ba sa buaya!

Giklaro ang tataw

Ang hepe sa Cebu City Transport Office milantaw nga aduna lang gihapo’y trapik nga mahitabo bisan sa pag-abli sa underpass dapit sa Mambaling sa panahon sa “rush hour” tungod kuno kini sa gidaghanon sa sakyanan nianang mga taknaa. Mao ba kini Sir, ang giingon sa Iningles nga “Clarifying the obvious”?

“Bagong pari, bagong ugali”

Ang Archdiocese sa Cebu mopahigayon og dakong paglahugay sa kapin 320 ka mga pari sa pito ka mga distrito ug archdiocesan communities.  Gikatakda nga ang mga kapari-an nga maapil sa lahugay moreport na sa ilang tagsa-tagsa ka assignment karon Agosto 6, 2019.

Ang hingtungdan nga mga parokyano makasinati na usab sa epekto sa panultihon sa Tagalog nga nagkanayon, “Bagong Pari (Hari), Bagong Ugali.