Napahimuslan na

Sa katapusan, mapuslan na gyud ang underpass nga gitukod diha sa Mambaling ug Basak San Nicolas sa dakbayan sa Sugbo.

Giablihan kini sa publiko kaniadtong Sabado ug nagsugod na ang mga motorista og paggamit niini.

Atong mahinumdoman nga miani og dakong oposisyon ang maong proyekto gikan sa nagkalainlaing sektor gumikan kay dili kuno kini maoy solusyon sa dakong problema sa sige nga kahuot sa trapiko dihang dapita.

Ug karon maagian na ang maong underpass, ang labing dako nga infrastructure project diha sa south district.

Ug sa akong nakita, dako gayud tuod kini og matabang sa problema sa trapiko sa maong dapit kansang mga molupyo hagbay rang nag-antos sa maong maldisyon.

Karon akong namatikdan nga mihupas man ang mga kritisismo batok sa maong proyekto karon nga giablihan na kini sa publiko.

Sukad sa niaging mga adlaw human sa pag-abli sa underpass wala na ko makabasa sa social media og mga post nga nagbatikos niini.

Tungod ba kaha kini sa kahapsay na sa dagan sa trapik sa maong dapit mao nang milurang na ang mga kritisismo?

So, insakto gayud diay ang pagbutang sa kagamhanan sa maong dakong proyekto diha sa maong dapit.

Hinuon sakit na gayud ni sa mga Pinoy ang puro panaway. Basta wala pa gani maplastar ang usa ka proyekto wala na gyuy undang sa saway ang uban kanato kay lagi dili kini magsilbi ug nga sayang lamang ang pundo sa gobiyerno.

Apan kun nagbarog na ang maong proyekto ug nga napuslan na sa publiko, dayon lamang og hilum kining mga sige og alkontra niini.

Mao kini ang bahin sa atong kultura nga lisod nang mabag-o sa kinaiya sa mga Pinoy.

Kay kun wala pa gitukod ang maong underpass sa maong dapit, pabilin hangtud karon ang maong problema sa trapiko.

Ug karon naprobar na gayud nga epektibo diay ang maong proyekto ug wala gayud mausik ang hapit sa P700 milyones nga gigahin sa national government niini.