Kon mada pa, kon di pa matilok ang tangke sa imong sakyanan, ayaw una og patubil karong adlawa. Kon makapaabot ka hangtod ugma sa alas-6 sa buntag, makaapil ka og pahimus sa labing dakong us-os sa presyo sa mga produkto sa lana karong tuiga.
May pipila ka kompaniya sa lana nga nilaslas sa ilang presyo sa niaging weekend.
Apan ang labing dagko ug labing daghan ugma pa mopatuman sa kinadak-an nga laslas:
P2.70 matag litro sa krudo;
P2.45 matag litro sa gasolina; ug
P2.60 matag litro sa kerosene.
* * *
Nitibugsok na og kapin sa 20% ang presyo sa lana sukad sa Abril karong tuiga tungod sa kabalaka sa pagluya sa demanda samtang nagkaluya ang kalibotanong ekonomiya.
Nakapasamot sa kabalaka ang pinatuyangan nga pagpanghagad ni US President Donald Trump og gubat sa patigayon batok sa China ug Mexico.
Wa sab katabang nga dungan, o tungod ba kaha, sa pagtidlom sa presyo sa lana nagbaha sab ang suplay sa lana.
Gibanabana nga sa niaging semana nisobra ang suplay og pito ka milyon ka baril, ang kinatas-an sa niaging duha ka tuig.
* * *
Usa ug tunga ka buwan ang nilabay, nitiyabaw ang mga konsumidor sa pagsige og saka sa presyo sa lana tungod sa ekonomikanhong silot nga gipahamtang ni Trump batok sa Iran ug Venezuela ug sa gubat sa Libya. Apan sa ikaduhang sunudsunod nga semana karong semana, nibarato ang lana.
May mga pangagpas nga temporaryo ang pag-us-os sa presyo kon makab-ot ang kauyonan ug di mahinayon ang gikahadlokan nga trade war.
May mga timaan sab hinuon nga di dayon makabawi tungod sa pagluya sa mga industriya sa Estados Unidos ug China.
* * *
Sa duha ka sunudsunod nga pagbarato sa lana, di kalikayan ang pagtumaw sa mosunod nga mga pangutana:
Di ba makiangayon lang nga bakwion ang dakong uminto sa plitehan sa mga sakyanang pamasahero?; ug
Gi-unbundle na man kaha ang presyo sa lana, gi-detalye na man kaha ang mga sukaranan sa sinemana nga pag-usab sa presyo, nganong nisugot man ang Department of Energy (DOE) nga magkopyahay gihapon ang mga kompaniya sa lana sa uminto sa ilang mga presyo hangtod sa kataposan nga usa ka dako?
* * *