Lisud ning mangambisyon ta og nindot nga kasaulogan kay nagpasabot usab kini og hustong budget. Apan bisan pa niining maong babag ang tanan mahimo gyud kun tuyoan lang sa hingtungdan. Kun ako ang mag birthday dili kaayo ko particular og hikay.
Apan tinuod gyud diay ang ilang giingon nga basta importante ang usa ka tawo gahinan gyud nimo ni og panahon ingon man gasto. Natural, Mayo karon Flores de Mayo gasto man gani ta og dili mahinungdanon samot na kang Mama Mary nga Mapinanggaon. Mao nga dinhi sa Mohon among gihimo ang Santa Cruzan agig pagpasidungog sa Mahal nga Birhen. Bahala na ang gasto ang mahinungdanon mao nga ang tanan magmalipayon.
Kitang mga Pilipino matud pa andam mohatag sa bisan unsa nga nia nato. Dili tungod kay buot tang mopasundayag apan buot lang natong ipaambit ang bisan unsa nga mahinungdanon dinhi nato. Kaniadto wala ko kasabot kun nganong hikayan gyud ang nag birthday bisan kun lisud ang panudlanan.
Ang kasagarang tubag sa katiguwangan mao nga sagdi lang kay pasalamat kini sa Kahitas-an mao nga hangtud karon daghan gihapon ang moihaw og manok aron sa atong agtang ipadugo. Ug si bisan kinsa nga makakita atong agtang nga dunay marka sa krus nga dugo ang moingon gyud og Happy Birthday! Ug nianang adlawa kita nahimong mapasigarbuhon. Salamat sa manok nga nihalad sa iyang kinabuhi aron adlaw’ng natawhan saulogon.
Sa laing bahin nahimong daw sa idlas ang uban. Mas mahinungdanon salapi kaysa relasyon. Dili buot morisgo og gasto tungod kay alang nila anugon ang salapi. Apan ang bantugang actor nga si Jacky Chan nagkanayon man: “Travel because your money will come back to you but your time won’t. “
Nahapugwat ko gikan sa halawom nga pagpamalandong sa dihang nadungog ko ang bakho sa akong pag-umangkon. Wala diay siya mapaliti og bag ingon man sapatos. Ako siyang gialam alaman nga sa Danao siya kuyogon sa iyang Nanay aron mapalit ang iyang buot paliton.
Sa akong pagtan-aw sa akong pitaka murag wala nay sulod apan dunay pipila nga tingali paigo pa sa iyang panginahanglan. Nipahiyom ang bata ug gipahiran ang luha sa iyang mga mata. Pag-uli nako sa kumbento nikaon na lang ko og sardinas ug bahaw kay di na paigo panud-an ang kwarta nga nahuptan. Bisan sa kahagip-ot dunay paagi nga kita makasaulog sa kinabuhi, Oo sa yano apan makahuloganon nga kinabuhi. Sa kaulahian bugtong handumanan sa kasinatian mao ray atong mahinumdoman.