Gidominar

Sama sa gipaabot, gidominar sa mga kaalyado ni Presidente Rodrigo Duterte ang resulta sa miaging piniliay. Ang umaabot nga 18th Congress langkuban sa hapit tanan kapartido sa presidente.

Bisan didto sa Senado mayoriya sa mga gipaluyohan ni Duterte midaog sa bag-ohay lang nahuman nga eleksiyon. Sa 12 ka mga giproklamar nga mananaog pagka-senador siyam nila ang direktang gituboy ni Duterte.

Ang mga giproklamar na nga mananaog pagkasenador naglang-kob nila ni reelectionist Senator Cynthia Villar, Grace Poe, Bong Go, Pia Cayetano, Bato Dela Rosa, Sonny Angara, Lito Lapid, Imee Marcos, Koko Pimentel, Bong Revilla, ug Nancy Binay. Ang resulta nagpakita nga mas milig-on pa ang impluwensiya ni Duterte sa Kongreso. Ambot angayan ba ning ikalipay tungod kay way mamahimong babag sa programa sa presidente nga magkinahanglan og suporta sa Kongreso o angayan ning ikaguol tungod kay ang uban sa mga gihatagan sa mandato kwestiyonable ang kridibilidad.

Usa sa akong gikagul-an mao ang pagdaog nilang Revilla ug Marcos kini tungod kay nagpasabot ni nga di gyud mopatuo og isyu ang mga botante. Bisan sa pasangil sa pagpangawkaw sa iyang pork barrel daw sa wala kini motuhop sa huna-huna sa publiko.

Giabswelto man siya sa kasong plunder apan dili ikalimod nga siya maoy atong gitugyanan sa maong pundo nga angayan untang napahimuslan sa mga kabus. Si Marcos sa pikas bahin, wala pa ba gyud ta makakat-on sa atong kasaysayan?

Apan unsaon ta man nga mayoriya sa mga botante gusto man nga sila mahimong senador. Ang akong panghinaot nga dili nila pakyason ang kadaghanan nga mihatag nila sa pagsalig bisan kun dili na gyud unta sila kasaligan. Mao ni usa sa mga negatibo nga epekto sa demokrasya.

* * *

Nireklamo si outgoing Governor Hilario Davide III sa suwat ni Governor-elect Gwen Garcia nga mipahimangno kaniya sa dili pagbuhat og mga butang nga makaapekto sa mosunod nga administrasyon.

Giangkon ni Davide nga nainsulto siya sa pasidaan nga dili mohimo og mga midnight appointment ug midnight deals gikan karon hangtud sa Hunyo 30. Si Davide nga usa ka abogado nagkanayon nga nasayod siya unsay angayan niyang buhaton. Kun mao, angayang iyang ipahunong ang renewal sa mga quarry permits. Ang akong tinubdan nagkanayon nga labihan ka paspas sa pag-renew sa mga permit diha sa buhatan sa PENRO.

Kun wala man masayod ang gobernador niini, angayang iyang susihon og badlongon ang hingtungdang mga opisyal nga responsabli.

Pasagdi nga ang mosunod nga gobernador na ang mohukom i-renew ba o dili ang permit sa mga quarry operators dinhi sa Sugbo.