Ang pinili sa katawhan

Nahukman na sa katawhan ang mga kandidato human sa eleksyon niadtong miaging adlaw.

Adunay napili ug naa usay wala mapili sa pwesto, ingon gyud niini ang kinabuhi sa mga politiko kay igo ra man sila mi-apply sa trabaho.

Swerte swerte lang, kuno matud pa sa uban kay naay mga kandidato nga alang sa ubang mga tawo dili lig-on kay walay makinarya ug wala usay suporta sa kinabag-an ilabi na sa mga barangay kapitan apan maoy nihakop sa malutong nga kadaugan.

Dili seguro swerte kun dili destiny o itinadhana ang kapalaran sa tinagalog pa nga siya ang moserbisyo sa mga konstituwente.

Labaw sa tanan seguro adunay nakita ang  katawhan nga hiyas nianang tawhana nga maoy masandigan nila sama sa mga ginikanan.

Himoon nakong sanglitanan ang nahitabo ni Pajo Barangay Kapitan Ahong Chan nga maoy napili pagka mayor sa dakbayan sa Lapu-Lapu.

Kong wala ko masayop, walay kapitan nga misuporta kaniya diin pulos didto sa iyang kontra nga si kanhi Kongresista Boy Radaza.

Si Cebu City Mayor-elect Edgardo Labella sa sinugdanan daw gibalewala lang sa uban ang iyang tinguha sa pagbangga sa lig-on niyang kaatbang nga si incumbent Mayor Tomas Osmeña kinsa majority sa mga kapitan kaniya nakapusta.

Hilomon, mapaubsanon ug buotan nga maoy charm niya nga nakapadani sa mga botante.

Pwede ra duolon anytime, pwede ra kuhiton bisan kanus-a nga murag higala maong siya gipili sa mga Sugboanon.

Dinhi makita nga dili mo matter ang tingog sa mga political leaders kun dili ang hukom sa katawhan ang mopatigbabaw.

Sama sa nahitabo kaniadto ni Presidente Duterte nga wala gyuy mga opisyal ang mipaluyo kaniya apan karon siya na ang presidente sa republika nga nakakuha kaniadto og 16 million votes.

Si Chan ug Labella duha lang sa mga lider nga gihukman sa katawhan human sila ni apply nga mamahimong sulogoon sa lungsod.

Murag nahisama ang ilang kapalaran sa nahitabo ni PRD, aw ka linya man diay ni silang Chan ug Labella sa PDP.

Human sa adlaw sa paghukom, mas dakong hagit ang ilang atubangon mao ang pagtuman sa ilang gipanaad nga seguradong paninglon sa katawhan.