Sa atong kamot ang kaugmaon

Kun sa korte pa, karong adlawa ang promulgation o hukman ang mga kandidato nga nagpapili sa tagsa-tagsa ka pwesto gikan sa national hangtod na sa local nga position.

Sa kamot sa mga botante itugyan ang kapalaran ug kaugmaon dili sa mga politiko kun dili natong mga tawo nga magbutang kanila sa pwesto.

Pila man ang inyong nadawat? Gikan sa kinagamyan hangtod na sa kinadak-an pila ang inyong natigom? Kinsa ang kinadak-an og bayad?

Kini nga pangutana adunay kapasikaran tungod kay mao kini ang sakit nga kamatooran.

Mga nawong og kwarta, harvest time gud kuno karon, pwede gyud dawaton o koprason ang tanang kwarta kutob sa nanghatag ayaw mo ka konsensya kay mao nay angayan himoon sa mga tawo ngadto sa mga politiko nga hilig mag vote buying.

Apan kita pa gihapon ang adunay last say sa tanan, kita ang magbuot kon si kinsa ang haum ug angayan nga ibutang nato sa pwesto nga makahatag og tinod-anay nga serbisyo.

Dili naman siguro buta ug bungol ang mga botante karon. Kun bright ang mga kandidato mas genius ang mga botante nga dili mailad aa tam-is nga saad.

Dili ang mga botante motuyok sa kamot sa mga kandidato kon dili sila ang patuyokon sa atong mga kamot.

Sukad kaniadto susama sa bola ang mga tawo nga duwa duwaan, i-dribble apan karon mas maayo moduwa ang mga tawo, kaniadto usa ka pahiyom ug lamano murag malukmay na ang buot sa mga botante apan karon maantigo na usab makig plastikan ang mga botante.

Karong adlawa hukman nato ang atong kaugalingon nga kaugmaon busa huna hunaon nato sa makadaghan nga higayon ang atong hukom kay pait kaayo mag antos sulod sa laing tulo ka tuig sa mga kandidato nga maayo lang sa saad nga dili matuman.

Ang resulta sa eleksyon karong adlawa maoy consequence kun gisubay ba nato ang sakto ug haum nga buhaton nga pinasubay sa atong konsensya ug dili sa kwarta.