Ang parkingan sa Arcdiocesan Shrine of our Lady of Guadalupe de Cebu gihimo alang sa mga manimbahay nga magdalag sakyanan ug alang niadtong adunay importanteng tuyo sa opisina o konbento. Usa ra ka oras ang misa.
Ug kon mobayad man lang para sa misa sa bunyag, kasal, patay o uban pang petisyon, tingale, wala pay usa ka oras, human na.
Apan nahibulong ang Team of Pastors. Kay inig abot sa adlawng Domingo, sayo pa gani sa buntag, daghan nang mamarking unya diyotay ra ang manimba. Hinuon sa ikaduhang misa sa buntag hangtod na sa sunodsunod nga mga misa, magkaanam na kapuno ang simbahan sa mga manimbahay.
Ang problema kay inig padulong na sa ika alas 5:30 sa hapon nga misa hangtod na sa gabii, maghuot na ang mga mag-abot-abot nga sakyanan, mapugos sa pagpaabot kanus-a mahuman ang alas 4:00 sa hapon nga misa aron kon may mogawas, makapuli.
Gumikan ning maong kahimtang, gisusi sa Team of Pastors ang hinungdan.
Ug ilang nasayran nga may car owners nga ilang sakyanan anha ibilin sa parkingan kada Biyernes sa hapon ug kuhaon inig ka Lunes na sa buntag. Mopasangil lag samba apan ang tumong mo-park sa taas nga panahon diay.
May tag-iya pa gyod nga niadtong wala pay National Youth Day giparking iyang sakyanan. Ug nahuman na lang ang maong dakong kalihokan, ang iyang sakyanan anaa gihapon.
Diay guba na, dili na moandar. Mao nga gihimo na lang sa tag-iya og junk yard ang parkingan sa simbahan.
Nakalingolingo sa kahisagmuyo ang Team of Pastors.
Tiaw bay, ang manimba walay kaparkingan. Unya kadtong walay simbasimba mao na hinuoy nakaparking.
May naobserbaran pa gyod ang pari.
Dinhay lawom nang gabii, diin ang mga suga sa parkingan gipamalong na, adunay nagparking nga sakyanan nga nag-uyog-uyog ang lawas.
Unsa kahay gibuhat sa mga anino didto sa sulod, no?
Gihimo na man lang lovers’ lane, uy, ang parkingan sa simbahan.
Nakahukom ang Team of Pastors nga wala nay paparkingon overnight. Kada human sa kataposang misa, sirad-an ug kandadohaan na nila ang tanang gate nga naglibot sa simbahan.
Hinuon, ila nang gipahibalo ang mga parokyano bahin niini. Ug ilang gipangayo ang kinasingkasing nga pagsabot.