Kaguliyang sa eleksiyon

Akong napanglantawan ang dakong kaguliyang atol sa adlaw sa eleksiyon, ilabi na dinhi sa dakbayan sa Sugbo. Busa, mentras may higayon pa, angay nga sila si Mayor Tomas Osmeña ug Konsehal Maryann delos Santos mangandam na daan aron makaaksiyon dayon sila.

Kon may mga armadong tawo man nga nanghasi sa ilang mga kaalyado sa politika didto sa bukid nga layo pa gani ang eleksiyon, unsa pa kaha sa adlaw na gyud sa botasyon. Kini maoy angay nila nga pangandaman pag-ayo.

Unsaon nga kontra man ni Osmeña ang kadagkoan sa kapolisan, mao nga makapaabot kita nga apikehon usab siya sa iyang mga kontra, unya dili pa gyud magpa-interview ang mayor sa mga sakop sa media.

Nagsalig ra si Osmeña sa social media. Aw basin og natan-aw niya nga sa social media, mas daghan ang masayod sa gusto niyang ipahibalo. Kaniadto, matawag ra nimo si Osmeña aron pakighinabian, apan karon lisud na kaayo.

Maayo unta og wala lay kagubot nga moulbo atol sa adlaw gyud sa eleksiyon karong Mayo 13.

* * *

Sa Mandaue City, wala kita makadungog nga ang kampo ni Kongresista Jonas Cortes mireklamo nga gihasi sila sa mga polis. Nalipay kita niini nga ang mga polis sa Mandaue mora’g neutral ug walay gidapigan kanila ni Cortes ug Mayor Luigi Quisumbing.

Sa mga siyudad sa Talisay, Toledo, Lapu-Lapu, Naga, Carcar ug Danao, ug bisan na sa Bogo, wala kita makadungog nga ang mga polis mihimo’g lakang nga makapaapike sa usa ka kandidato.

Pero nakabantay ko nga diha sa Mandaue, ang social media gipahimuslan sa mga dumadapig ni Luigi ug gidaot si Cortes kay may drug matrix man nga gipublikar nga kuno, sakop si Cortes sa drug syndicate.

Giapil pa gani ang chief of staff ni Cortes nga si Atty. Jamaal James Calipayan.

Dili kini katuohan kay bisan gani ang hepe sa kapolisan sa Mandaue mitataw man gyud nga wala sila makabantay nga si Cortes mag-apil-apil kon duna sila’y madakpan nga drug suspects.

Sama ra pud dinhi sa Dakbayan sa Sugbo nga may gipakatap sab nga drug matrix sa social media ug gibutang nga si Mayor Osmeña, usa sa mga nagpadagan sa ilegal nga drugas.

Nahinabi nako ang higala ko nga direktor sa PDEA nga nadestino dinhi sa Sugbo kaniadto ug iyang gitataw nga pulos ra gyud na binuang ang gipakatap nga matrix nga sila si Osmeña ug Cortes apil sa sindikato sa drugas.

Mora’g husto ang akong amigo nga opisyal sa PDEA nga nagtuong pangdaot ra gyud kini aron nga dili mobotar ang mga tawo kanila ni Osmeña ug Cortes.