Mas dakong umento
Mas dakong umento sa presyo sa mga produkto sa lana ang mapaabot sa mga konsumidor karong semanaha.
Tungod ini, mas nibug-at ang pasidaan sa langyawng mga ekonomista nga Pilipinas ang labing maapiki sa gikabalak-ang padayon nga pagsulbong sa presyo sa lana sa mosunod nga mga buwan.
Kay samtang tibuok kalibotan ang mahiagom sa umento, mas dakong umento ang antuson sa mga Pilipinhon tungod sa pag-insistir ni Presidente Rodrigo Duterte sa pagbunal og dakong excise taxes sa mga produkto sa lana sa tulo ka sunudsunod nga tuig hangtod sa sunod tuig.
* * *
Sugod alas-6 sa buntag ugma, Martes, Abril 30, ipatuman nang uminto. Mao ning mga banabana sa mga eksperto sa industriya sa lana:
Mosaka og gikan sa P0.70 ngadto sa P0.80 matag litro ang gasolina;
Mosaka og gikan sa P0.70 ngadto sa P0.80 matag litro ang krudo; ug
Mosaka og gikan sa P0.75 ngadto sa P0.85 matag litro ang kerosene.
Karong Miyerkules, Mayo 1, Adlaw sa Pamuo, mosaka sab og gikan sa P0.50 ngadto sa P1.00 matag kilo ang liquefied petroleum gas (LPG).
* * *
Ang nakapasulbong sa presyo sa lana mao ang pahibawo ni US President Donald Trump nga sugod karong Mayo 1 di na makapalit og lana gikan sa Iran ang walo ka nasud nga gipalingkawas sa ekonomikanhong silot sa Estados Unidos: China, South Korea, Taiwan, India, Turkey, Japan, Italy ug Greece.
Ang Saudi Arabia wa magdali pagpausbaw sa ilang produksiyon human napaso sa wa paabutang pagluwat ni Trump sa waivers nga nakapatibugsok sa presyo sa lana niadtong Nobyembre.
* * *
Karong Hunyo pang sunod nga tigom sa Organization of Petroleum Exporting Countries (OPEC).
Kon motidlom pag-ayong suplay sugod karong semanaha, mahimong magpadayon ang agresibong laslas sa produksiyon sa OPEC ug non-OPEC countries ug busa mosulbong gyong presyo.
Apan niay laing timaan sa kadako sa tingog ni Trump pagtakda sa presyo sa lana sa merkado sa kalibotan, mahimong siya ra sab ang makapabalik og tidlom sa presyo.
Dayong tapos sa patigayon sa niaging semana, napul-ongan ang sulbong sa presyo tungod sa iyang awhag sa OPEC sa pagpabaha og dugang suplay aron nga di makabuylo og saka ang presyo.
* * *
- Latest
