Dear Atty. Divine,
Duna koy gipalit nga yuta nga 1,350 square meters, nahuman na og process ang title niini apan karon pa ko nakabantay nga sayop man ang nabutang nga land area sa title kay instead nga 1,350 square meters nga maoy akong gipalit nga mao sab ang nabutang sa Deed of Absolute Sale, ang nabutang sa title 1,150 square meters ra man. Unsay akong buhaton aron makurihian ang land area nga nabutang sa title? Daghang salamat.— Gina
Dear Gina,
Kun gusto ka nga makurihian ang land area nga nabutang sa imong titulo, kinahanglan gyud ka nga modangop sa korte pinaagi sa pagpasaka og petition alang sa correction sa entry sa imong titulo. Adto kini nimo ipasaka sa korte sa lugar diin mahimutang ang maong yuta. Kinahanglan nga imong ipresentar sa korte ang ebidensya kun unsa gyuy matuod nga gidak-on sa yuta nga imong napalit. Kun ma- grant sa korte ang imong petition, momando ang korte sa Register of Deeds sa pagkurihir sa sayop nga entry sa land area sa imong titulo. Thanks and God bless.— Atty. Divine
* * *
Alang sa inyong pangutana ipadala lang pinaagi sa email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.