Adlaw nga Balaan

Lunes Santo karon nga kabahin sa pagbalaan nato sa mga adlaw nga nga gisakripisyo sa Ginoo ang Iyang Kinabuhi tungod ug alang kanato nga iyang mga binuhat.

Excited na ang tanan nga mamauli sa tagsa tagsa nga probinsya kay giisip man usab kini nga panahon sa pagbakasyon sa uban ilabi na kadtong nanarbaho sa mga lagyong dapit nga mopauli gyud aron magkatigom ang pamilya.

Ang uban looking forward sa bakasyon ngadto sa mga lagyong dapit ilabi na sa mga beaches kay summer naman usab lagi.

Gani duna nay nag file og leave of absence sugod karong adlawa hangtod na sa Miyerkules Santo aron taas kaayo ang bakasyon kay Huwebes ug Biyernes Santo wala namay trabaho.

Bisan unsa man ang rason sa excitement niining panahona kinahanglan hinumduman pirme ang tumong ngadtong gitimaan nato kining mga adlawa nga mao ang pag pamalandong.

Tan-awon nato ang mga sakripisyo ni Hesukristo nga nagpalansang sa krus aron lang kita maluwas.

Takos ba kita nga gipakamatyan sa atong Manububos?

Mao kini ang hinuktokan sa katawhan. Guilty halos ang tanan niining pangutanaha apil na gani ako tungod kay mahulog na usahay nga second priority ang pag simba kay lagi gipalabi ang laing mga butang.

Gani sa pagsulat nako niining akong lindog wala pa ko nakasimba nga Domingo sa Lukay ra ba kagahapong adlawa.

Ang pagpama-landong dili lamang panahon sa Semana Santa kon dili adlaw adlaw sa atong kinabuhi.

Sa dili pa kita matulog atong eksaminon daan ang atong tanlag kun nagbuhat ba kita sa matarong nga maoy bugtong gipangayo sa Manluluwas kon mituman ba kita sa Iyang mga kasugoan.

Sa pikas bahin, sa mga mobakasyon sa Semana Santa pamalandongan pud nato kun luwas ba ang atong mga pinuy-anan nga biyaan kay basin ini og uli nato wala na tay balikan o gihimulbolan na sa mga kawatan.