Ang paagi sa National Bureau of Investigation (NBI) sa pagsusi sa bangis nga pagpatay sa dalagita sa Lapu-Lapu City mao ang nakagiya sa Lapu-Lapu City Police Office (LLCPO) sa pagtultol sa suspitsado nga nikumpisal na nga maoy responsable sa krimen.
Nikumpisal si Police Colonel Lemuel Obon, hepe sa LLCPO, nga ang sukwahi nga resulta sa imbestigasyon sa NBI nakapugos nila sa pagsubli sa tanang kasayuran nga ilang nahipos ug sa direksiyon sa ilang pakisusi. Nakatabang ang ilang pagtutok sa CCTV footage nga maoy gipasikaran NBI sa pagdakop sa unang suspetsado.
* * *
Nitug-an si Obon sa Arangkada sa DYAB Abante Pa, Bisaya nga ang kinatibuk-ang footage may gitas-on nga 100 ka gutlo.
Ang nakadapit sa pagtagad sa mga imbestigador sa NBI mao ang ikaduhang tunga—gikan sa ika-50 ngadto sa tumoy sa ika-100 ka gutlo.
Gisuhid nilang Obon ang footage sukad sa sinugdanan ug gigantihan ang ilang pailob.
Nakit-an nila ang ikaduhang suspetsado nga kuyog sa babaye nga kamay-ong sa biktima.
Labaw sa tanan, may bahin sa footage nga nabantang ang nawong sa mas edaran ug mas dako og lawas nga suspetsado.
* * *
Nailhan nila ang suspetsado ug nahibaw-an nga may kasong kriminal sa pagpangulata og bata niadtong kataposang semana sa Marso, o usa ka semana human napasaka sa NBI ang kasong pagpatay batok sa unang dinakpan atubangan sa Lapu-Lapu City Prosecutor’s Office.
Wa magsaba silang Obon kay di ganahang mosukwahi sa NBI nga wa pay igong mga ebidensiya. Naglisod sila og sikop sa ikaduhang suspetsado kay nagbalhin-balhin og tago.
* * *
Gidasig ni Obon ang iyang mga sakop pagsige og paniid sa bay sa suspetsado kay nahibaw-an nilang suod kini sa iyang mga anak.
Gigantihan na sab ang ilang pailob niadtong Martes, Abril 9, dihang ilang nakit-an ang suspetsado pila ka metro gikan sa iyang bay sa Bankal.
Ang suspetsado nikumpisal dayon sa krimen. Nitakdo ang iyang mga detalye sa footage ug ubang ebidensiya nilang Obon.
Nasakmitan sab sa nagkadugo nga gunting nga giangkong maoy gidunggab ug gipanit sa nawong sa biktima.
Nagpasalamat si Obon sa giya sa NBI apan nanghinaot sab nga mopaluyo na lang sa buwag nga kasong pagpatay nga ipasaka sa kapolisan batok sa ikaduhang dinakpan.
* * *