Gilusad kagahapong adlawa sa interagency ang Interagency Coordinated Maritime Patrol sa Kabisay-an.
Gilangkoban kini sa Philippine Coast Guard, Philippine Navy, Department of Tourism, Philippne National Police, ug uban pang mga ahensya sa kagamhanan.
Ang mga sakyanan sa coast guard ug Navy sakay ang ilang mga personnel milibot sa kadagatan dili lang sa Central Visayas kondili lakip na sa tibuok Visayas.
Tayming kini sa Semana Santa ug pag-abot na sa summer season nga dagsaon sa mga lokal og langyawng turista.
Apan ang labing mahinungdanon nga mabantayan ang kadagatan nga posibleng kaagian sa mga terorista sama sa nahitabo kaniadto sa Bohol diin gisulod sa mga sakop sa Abu Sayyaf.
Maayo nalang kay dali ra silang na neutralize sa mga tinugyanan sa balaod ug wala makapangidnap.
Ingon usab niini kadto nga higayon ang nahitabo sa Bohol kay gaangat man to sa Semana Santa.
Bitaw mahinungdanon kaayo nga mamentinar ang kahapsay ug kalinaw kay mao kini ang puhonan nga makakabig og mga turista.
Sumala sa Department of Tourism nga 8 million ka mga turista ang mibisita sa Sugbo sa milabayng tuig.
Posibleng mosaka pa kini ning tuiga tungod sa bag-ong airport sa Mactan ug Panglao sa Bohol.
Dako og natampo ang mga tinugyanan sa balaod sa kalinaw hinungdan nga gipasalamatan sila sa Tourism Department ang mga tigpatuman sa balaod.
Mas maayong makapangandam daan aron dili malutsan kon aduna may mga nagplano og dautan sa atong dapit. Siyempre sa suporta usab sa katawhan ang labing mahinungdanon nga walay mahitabong kasamok.
Ma semana santa man o dili kinahanglan nga magmatngon diin kon adunay masigpatan ilabi na sa kadagatan moreport dayon kini sa mga otoridad.