Sa ubang demokratikanhon nga mga nasud, yagaw sab ang ilang mga piniliay, init sang lalis ug tinulisokay, may linabayay sab gani og lapok ang pipila, apan di sama sa ato nga magkabulingit ang tibuok palibot sa ilegal nga mga materyal sa kampanya.
Di man tingali pulos mga anghel ang ilang mga politiko, kay mas mat-an pa man sab sa pinya ang pipila sa ilang kadagkoan. Tingali tungod ni sa kahigpit sa ilang mga lagda sa makiangayong piniliay. Ug mas higpit ang pagpatuman sa ilang mga lagda batok sa paghugaw-hugaw.
* * *
Dinhi sa ato, inay nga mangita og mga paagi sa pagbadlong sa bantang nga kalapasan, ang hingtungdan nga mga ahensiya nangita na man hinuot og mga lusot unsaon nga di mapatuman ang mga lagda:
Ang Commission on Elections (Comelec) nibasol sa makauuwaw nga hukom sa Korte Suprema nga di supak sa balaod, hinunoa kabahin sa gawasnong pagpadayag, ang pangampanya sa wa pay campaign period; ug
Ang ubang lokal ug nasudnong mga ahensiya sa gobyerno utrong nangiyugpos tungod sa kahadlok nga mabawosan kon ang ilang mga gibadlong maoy modaog sa piniliay.
* * *
Ang panagang sa Comelec nga wa silay mahimo pagbadlong sa ilegal nga campaign materials nga nanguhong pagkahuman gyod sa pagpasaka sa mga certifico de candidatura sa Oktubre sa niaging tuig kay di nang kasilotan ang premature campaigning di na nila kapasalipdan dihang:
Nagsugod ang campaign period sa mga nanagan pagka senador ug partylist groups niadtong Pebrero 12 apan gipasagdan gihapon ang campaign materials nga sobrang gidak-on sa gidili nga mga dapit; ug
Nagsugod ang campaign period sa lokal nga piniliay niadtong Marso 29 apan nisamot ang kalapasan.
* * *
Samtang dali rang dakpon ug multahan ang kasarangang mga molupyo nga nakalapas sa mga lagda batok sa paghugaw-hugaw sa kabaranggayan, kalungsoran ug mga dakbayan, way mangahas pagbaraw sa mas naghitak nga campaign materials kay:
Ang lokal nga mga opisyal ra man sab nga maoy nagpanday ug mopatuman unta sa mga ordinansa ang nag-una-una og pabadlong; ug
Bisan ang nasudnong mga ahensiya nilingiw lang sa kalapasan kay mas gamhanan pa man ang mga malapason, nga makahimong makapakulob sa kaldero sa mga tigdakop kon maghilas-hilas sa pagtuman sa ilang trabaho.
* * *