Kapolisan di na kasaligan?

Nauso na ang pagpusil-patay og mga drug pushers pinaagi sa buy bust operation nga halos matag adlaw, pirmeng ipahigayon sa  daw  wala nay kaluoyng kapolisan, diin sagad, otomatik silang mopagawas og letihimong rason: Nga napugos lang sila sa pagkablit sa ilang armas kay misukol kuno ang dakponon.

Ang makapahibulong, kay ang tagtungod nga nakasaksi sa hitabo, miingon nga walay dalang armas ang iyang anak.

Ug nganong may pistola ug shabu na man kini human pusila-patay sa polis?

Igsuon sa usa ka estudyante sa dakong unibersidad sa Sugbo misugilon nako nga samtang iyang manghod, (Airven, di tinuod ngalan) ug klasmets nangaon atbang sa ilang eskuylahan, kalit lang may mga polis nga miduol sa ilang lamesa, nangutana kun sila ba kadtong mga estudyante nga may kotseng giparking.

Mitubag silang dili. Pero naunsa bang gidakop man gihapon sila?

Gipasanginlang user ug pusher. Gikuha sa mga polis ilang bag ug gitagsatagsa paghuho.

Apan wala gyuy nakit-ang illegal drugs ang mananakop.

Apan ambot, unsay nasulod sa ulo sa kapolisan nga gidala man sa presinto ang mga estudyante?

Ang sakit, kay nadunggan sa mga estudyante ang usa ka polis nga nangutana sa ilang labaw kun unsang klaseha sa illegal drugs ang ilang gamiton isip ebidensiya nga ilang ipasangil: shabu ba, o marijuana? Dali rang nakatubag ang labaw, nga marijuana lang kuno kay estudyante man ang ilang gisikop.

Unya, nakit-an nilang naglikit og marijuana ang polis gamit ang tissue paper ug gisulod ngadto sa ilang bag.

Pagkatapos, misuyop ang polis og marijuana ug gipabuhotan sa aso ilang nawong aron mogawas sa imbestigasiyon nga mga user sila.

Pastilan, no? Kaluoy diay sa mga bata nga makursonadaha’g dakop sa kapolisan unya butang-butangag sala aron lang ingnon nga ilang operasyon lehitimo? Wala gyud intawoy bawot! Gipamun-og pa ra ba gyud kuno sila!

Nag-amot-amot ug nagkapangkapangka pagpangitag kuwarta nga ipiyansa ang mga igsoon ni Airven aron temporaryo lang makagawas sa maluibong prisohan.

Ug niadtong Marso 28, graduation day nila, wala gyud motunga si Airven kay gawas sa kaulaw nga gihambin, na-trauma pa gihapon ang inosente.

Kining di makiangayong hitabo, naghulagway lang nga ang kapolisan (hinuon di tanan), dili na gyud kasaligan ning atong panahon.