EDITORYAL - Uwahi nang managang

Karong nagnihit na ang tubig sa Metro Cebu gikinahanglan na ang pagdaginot sa mga tawo. Lisud kaayo ang walay tubig sa mga panimalay tungod kay matag karon ug unya mogamit man gyud og tubig.

Aduna nay mga lugar karon sa Metro Cebu ang nakasinati og tagsiyam ka oras nga walay agas sa tubig. Ang uban maabtan gyud gabii ayha pa moagas ilang mga gripo.

Nadungan sab kini sa mga water interruptions nga gipatuman sa Metropolitan Cebu Water District nunot sa nangaguba giayo nga mga tubo ug problema sa mga atabay nga gikuhaan nila sa tubig.

Ang siyudad sa Sugbo nagsugod na pagrasyon og tubig sa mga dapit nga apektado samtang ang labing nagrabehan mao ang mga bukirong mga barangay mao nga hatdan na sila karon og tubig.

Niadtong mga tubig-tubigan, mahimo ra kaayo silang moikyas gikan sa kaalimuot ug walay tubig nga Metro Cebu pinaagi sa pagbakasyon.

Kun walay importanteng buhaton dinhi karong nahuman na ang klase mas maayong mamauli nalang ang mga estudyante ngadto sa probinsya kay  didto may igo silang suplay sa tubig gikan sa ilang mga bomba ug mga kasapaan.

Sa mga taga siyudad nga walay kapaingnan karong mga panahona, mas maayong magtuon na pagdaginot sa tubig ug mamalit og daghang sudlanan niini aron adunay mapundo kun moagas na.

Sa mga hingtungdang mga ahensya sa gobiyerno, unta karon palang maghunahuna sila og unsay angay buhaton aron dili na kini masubli pa.

Dili na unta angay pang maghuwat nga moigo na ang huwaw ug nagnihit na ang tubig, ayha pa magkarakara paghunahuna unsay buhaton.

Kay kini nga sistemaha mao may naandan karon ug angay na untang usbon.

Managana na unta silang daan kay nagkadako ang populasyon matag adlaw ug matag usa ka tawo magkinahanglan gyud og tubig.