Buko juice

Niining ikaduhang adlaw sa official nga pangampanya sa lokal nga mga kandidato, atong panghinaut nga kalamdagan pag-ayo ang mga pumipili aron ma-objective sila sa ilang pagbotar, ug dili magpadala sa naandan nga mga election promises nga sagad ma-broken tapus sa eleksyon, sumala sa atong nasinati.

Samtang magkainit ug manghingusog na ang pangampanya sa mga buot moalagad sa lungsod, day-in-day-out, 24 hours a day, mahimong pukawon bisag tungang gabii, kita dinhi ning atong lindog, mo-abstain lang una ta makadiyot paghisgot sa politika, in deference to the Lenten Season.

Dugang panghinaut nga sa ilang pagtanyag sa ilang kaugalingon pag-alagad, dili unta nila ilubong sa kaulaw ang ilang mga kaatbang nga sama kanila buot lang usab moalagad sa lungsod with honesty, integrity and honesty (bisan tuod og kining maong mga mithi ug mga values irrelevant na kuno kini karon).

In the meantime, magpalain ta. Maghisgot ta’g buko juice. Daku na’g kadaot ang El Niño ngadto sa atong kaumahan. Ug usa sa naapektohan pag-ayo, gawas sa MCWD, mao ang mga mag-uuma sa lubi.

Sa Eastern Visayas lang, adunay mga 3.5 milyones ka tawo nga dependent sa coconut industry. Kini sa Eastern Visayas lang. Pila kaha sa tibuok nasud?

Philippine Coconut Authority (PCA) nag-awhag kanato to “switch to buko juice from soft drinks to benefit copra farmers.”

Si Jeffrey de los Reyes, PCA Eastern Visayas Manager, nag-awhag sa mga national ug local government agencies to serve buko juice imbis soft drinks sa ilang mga seminar ug ubang kalihokan isip pagtabang sa mga mag-uuma sa lubi nga karon na-igo sa nagkunhod nga presyo sa kopras.

Atol sa Summer Buko Fest nga gihimo sa rehiyonal nga buhatan sa PCA, si de los Reyes nagkanayon:  “If one-half of our population will drink buko everyday, it will be a big help to our farmers. With the help of LGUs, let’s make buko available even in subdivisions .”

Bitaw, gawas nga makatabang kita pagpalambo sa coconut industry, akong tan-aw mas healthful pa ang buko juice kay sa mga soft drinks (ako ra ning wild imagination, I could be wrong).

Gikan sa P38 nga presyo sa copra mikunhod kini ngadto sa P12 na lang sukad pa sa Enero karong tuiga. Gisugyot usab nga gawas sa buko juice, adunay laing mga produkto gikan sa lubi sama sa coconut sugar, coconut wine (tuba), vinegar, coco coir ug mga pastries.

Mahimo kaha ni natong mga Pinoy, nga ang ato ra mang kaugalingong kabulahan ang atong gihunahuna. Wala kitay paki unsay dangatan sa uban, bisan sa atong mga silingan, ug sa atong nasud. Wala kanatong mga Pinoy ang patriotism.

Sayun ra kaayo kining buhaton, apan dili kini mahimo natong mga Pinoy. Pananglitan, kining mga miting unta sa mga politiko, nganong dili man idalit ang buko juice?

Ug aron dili magkapuliki unya ang mga producer sa buko juice, gikinahanglan kaayo ang tabang sa gobyerno aron maka-produce sila’g igong buko juice, labi na kon kita nang tanan ang manginom og buko juice. 

Gawas sa pag-awhag pagpainom og buko juice, unsa may laing mahimo sa PCA pagtabang sa mga coconut farmers ug pagpalambo sa coconut industry?