Dear Atty. Divine,
Duna koy ig-agaw nga ang akong mga ginikanan ang nagpadako ug amo na siyang giisip nga igsuon. Apan tungod kay tiguwang na ang among mga ginikanan nakahuna-huna sila nga idonar ang portion sa yuta sa among ginikanan sa probinsya ngadto kaniya aron aduna sab siya’y katukuran sa iyang kaugalingong balay. Apan ang usa nako ka igsuon pagkahibawo niya niini hugtanong misupak ug gusto niyang ipa revoke ang Deed of Donation. Ang akong pangutana kun mamahimo bang mobabag ang akong igsuon sa pagdonar sa property nga human na man napirmahan ang Deed of Donation? Mamahimo bang i-revoke ang maong donasyon? Daghang salamat.
Naome
* * *
Dear Naome,
Kun ang imong ginikanan maoy tag-iya sa property nga gidonar then duna silay katungod nga modesisyon kun unsay ilang buhaton sa maong property. Buot ipasabot nga dili makababag ang anak sa unsay gustong buhaton sa ilang ginikanan sa ilang property as long as dunay igong property nga gibilin ang nagdonar alang kanila ug sa ilang heirs. Once mahatag na ang property ug duna na kini acceptance sa gihatagan, lisud na ang pagbawi niini gawas lang kun dunay gihimo ang donee batok sa Donor o sa iyang pamilya nga matawag og ingratitude basi sa Art. 765, par. 1 sa atong Civil Code, sama sa paghimo sa donee og krimen batok sa donor o sa iyang pamilya, kana pwede nang kabasihan sa revocation sa donation apan kun way nahimong kasal-anan ang donee then way mahimong basihan sa pagbawi sa yuta nga gihatag. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St , Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.