Botika mikuwestiyon sa Senior ID

Kun unsa kataas ang daghang katuigan sa pagpangalagad sa empleyado hangtod na-senior citizen, mao usab kini ang gidugayon sa pagbinayad niyag income tax ngadto sa Bureau of Internal Revenue (BIR).

Ang kuwartang nakolekta sa gobiyerno nga gikan sa mga mamumuo maoy isuweldo sa kagamhanan ngadto sa mga public servants. Ug usab, igasto sa mga proyekto nga nahunahunaang tukoron sa atong mga lider.

Subo lang palandungon, nga ang kinatibuk-ang kantidad nga gigahin sa usa ka proyekto, dili mahipunta tanan sa gipangandamang galastohan, kay ambot, ngano  gyud, nga may binandol mang salapi ang sekretong mahipunta sa mga kurakot nga bolsa?

Isip usa kanhi sa mga batan-ong 21 anyos, kinsa nabugbog sa pagpangempleyo ug sa pagbinayranay’g income tax hangtod na-senior, nakaingon gayod: ‘Kaluoy natong nagbinut-an sa pagpangitag kapanginabuhian nga gipangkurakot man lang ang atong hinagoan ning mga politiko, kinsa maoy gibotohan sa kadaghanan sanglit nagpatuo nga mga anghel hulog sa langit, apan mga anino diay nga iyaha sa kangitngit.’

Hinuon, dili tanang lider batoog kasingkasing. May mamon usab.  Kini lang mipanday sa balaod nga senior citizens may madawat monthly financial assistance, i-exempt sa 12% VAT, unya may 20% discount pa nga mapuslan sa medisinang paliton ug sa pagkaon nga orderon sa restawran ug uban pang pribilihiyo, lami kaayo premyohan ang punoa’g mga sanga nga mitukod  niini. Kay sama namong senior citizens, kinsa inig retire, gamay rag madawat, ang OSCA ID dako kaayog ikatabang namo.

Mao gani, nga dihang gikuwestiyon ang akong OSCA ID sa tindera sa usa ka botika nga anaa mahimutang sulod sa One Pavilion Department Store, Banawa, kun orig ba kuno kini, haskang isaha sa akong kilay.

Giingnan ko siya, kahagbay ra nakong pinalit og tambal dinhi, Miss, gani may pirma man ninyo kanang akong booklet, unya mangutana ka pa kun orig ba akong ID? Gusto ka ba nga mopayil ko’g complaint?

Didto pa nakaamgo ang tindera sa iyang sayop nga gihimo. Ug daw nabasang piso nga miputos sa daghang medisinang gipalit ko. Unta, dili na siya mousab. Kay agi’g pahinumdom alang sa tanan. “Any valid government ID showing the date of birth is a sufficient proof in the absence of OSCA ID.”