EDITORYAL - Makatabang ang pag-isa sa kamot?

Mianhi sa Sugbo si Pres.Duterte alang sa campaign rally sa iyang mga kandidato pagka-senador gikan sa ilang partido nga PDP-Laban ug mga guest candidates, apan wala magdahom ang mga lokal nga kandidato nga iyang kaalyado nga hasta sila ituboy sa pangulo.

Unsa man gyud kadako alang sa kandidatora sa usa ka politiko o tsansa sa kandidato nga modaog kun iisa sa ilang mga kamot sa presidente sa nasud?

Nasayran nga wala sa plano ang pag-isa ni Duterte sa mga kamot sa mga lokal nga kandidato kondili pagkuha lang og hulagway kauban sa presidente. Apan lahi ang nahitabo nga gikalipay sab sa mga kandidatong gituboy.

Ang mga prominenteng giisa ang mga kamot pulos oposisyon sa lokal nga pangagamhanan dinhi sa Sugbo nga silang 3rd District Gwendolyn Garcia ug Daphne Salimbangon nga modagan pagka-gobernador ug bise gobernador sa probinsya sa Sugbo.

Samtang sa Dakbayan sa Sugbo, ang sa Barug-PDP Laban nga silang Vice Mayor Edgardo Labella nga modagan sa pagka-mayor ug ang iyang pares nga si kanhi mayor Michael Rama.

Dako kini nga puntos para sa upat. Kang Labella makapalig-on kini sa iyang kandidatora. Samtang kang Rama, makapagaan-gaan kondili man makapapas sa kontrobersiyang paghingalan kaniya ni Duterte kaniadto nga siya drug protector, butang nga kusganon niyang gihimakak. Ang upat pulos nakigsangka sa mga kasamtangang naglingkod nga dunay makinarya, mayoriya sa mga mayor, o mga konsehal ug mga barangay kapitan. Hinuon may paglaom ang gikan sa ilang lunlon nga tigsuporta ug kadtong mga makabig ni Duterte.

Dili hinoon kadto garantiya kay duna man sab nangapildi kaniadto bisan giisa pa ilang mga kamot sa naglingkod nga presidente.

Apan dili lisod kun ang giisa nga kamot ligdong ug way buling ang pangalan sanglit ang mga tarong nga botante ilabi na ang mga batan-on magtan-aw man sab sa pagkatawo sa kandidato ug kun haom ba sa ilang gusto ug dili tungod lang sa pangalan.