Kinahanglang dili lang mopakita og ngipon kondili mopaak gyud unta ang mga ahensya sa gobiyerno sa pagpatuman sa mga balaod inay nga mohilom lang kun sungagon sa mga malapason.
Kini maoy bugtong paagi aron madisiplina gyud ang mga tawo hasta na kining mga kompanya nga nakalapas sa mga balaod ilabi na sa proteksyon sa kalikopan.
Kagahapong adlawa, gironda sa hiniusang pwersa sa National Coastal Water System sa Philippine Coast Guard, National Bureau of Investigation, Department of Environment and Natural Resources, Bureau of Fisheries and Aquatic Resources, Department of Public Works and Highways ang usa ka piggery farm sa Barangay Sangat sa Lungsod sa San Fernando.
Giingong direkta kining nagyabo sa ilang hugaw ngadto sa sapa lahos sa dagat nga klaro kining kalapasan sa Clean Water Act.
Ang maong dapit gibansagan na sa mga tawo nga “Sitio Baho” tungod sa 24-oras nga alisbo sa baho sa hugaw sa baboy.
Ang ingon niini nga mga binuhatan sa mga pribado ug dagkong kompanya maoy hinungdan sa grabeng kahugaw karon sa kadagatan ug tinubdan sa tubig.
Dili dayon sila dutlan sa balaod tungod sa kabaga sa ilang bulsa nga makabayad og mga de kampanilyang abogado nga molangaylangay didto sa korte kun mag-abot man didto ang kaso.
Ang resulta, supalpal pirme ang mga ahensyang gitahasan ug gihimong kataw-anan ang balaod. Sa mata sa publiko, ‘gahi’ ning mga kompanyaha kay bisan gani ang mga otoridad dili kapiog nila.
Apan kagahapong adlawa gironda na gyud sa mga otoridad ang maong establisamento.
Seryuso kini nga kalapasan ug dako ang purohan nga hasta ang mga lokal nga mga opisyales sa maong lungsod manubag gyud kun nganong nagpadayon ang operasyon niini nga daghan namang nakitang mga kalapasan.
Dako og papel ang mga LGUs sa pagprotihir sa kalikopan nga sakop sa ilang teritoryo. Asa man diay sila? Daghan pang sama niini nga mga negosyong padayon gihapong naglabay og hugaw ngadto sa kasapaan padung sa dagat nga angay nang pasirad-an.