Gugma sa magtiayong Pacquiao sa anak

Normal lang sa responsabling ginikanan ang pagbuhos sa tanan nilang gugma ug pag-amuma ngadto sa nagtubong anak, kinsa wala pa makakita sa unsay unahan nga gipadulngan? Matang sa unahan nga hagbay rang natilawan sa ginikanan kay ila na man kining naagian.

Hinungdan nga kon malantawan sa ginikanan nga ang karsadang gisubay sa anak mopadulong  sa halawom bung-aw sa kaalautan, ila gyong pugngan.

Puwerting hilak ni Jinkee Pacquiao dihang namatikdan niya nga ang kinamagulangang anak lalaki nilang Manny, Emmanuel Pacquiao Jr. (aka) Jimuel gusto pud nga mosunod sa dalan nga giagian ni Manny – ang kalibotan sa pamoksing.

Busa gipasabot ni Manny si Jimuel: “My son, daddy went into boxing because of poverty. You, you don’t need to box.”

Pero, blood is blood. Ug makita kini sa tinubagan ni Jimuel ngadto sa iyang Eight World Boxing Division Champ holder nga amahan: “Daddy, like you, boxing is my passion also. I want to be a representative of this country as an athlete.”

Kon kita maospital, pangutan-on dayon ta sa attending physician: “Wala bay highblood sa inyong pamilya, Sir, imong Tatay o Nanay di ba diabetic o may ulcer?”

Kitang makadungog makuyawan. Apan kinahanglan nga motug-an gyod ta sa tinuod. Kay kon diin god gikan ang dugo nga naglatay sa atong kaugatan, mao sab kini ang matang sa dugo nga naa nato.

Sa laktod, kon unsay naagiang sakit sa Tatay o Nanay, dako kaayog porsiyento nga mataptan sab ta. Sanglit, naa ni sa atong genes.

Mao sab kini nahitabo sa anak ni Manny. Pugngan man nila ang gusto sa anak nga mamahimong sikat nga boxer sa tibuok kalibotan, mosugmat gyod ang sakit sa pagkaboksingero nga anaa na, nahimo nang kabahin sa iyang kasingkasing.

Ug timan-i, kon asa ang kasingkasing, atua sab ang gugma.

Adunahan na ang magtiayong Manny ug Jinkee. Dili na mistil mokaog kumo ilang anak ibabaw sa ring bugti sa dolyares nga premyo. Dili sila gusto nga ang kasakit sa mga bun-og ug samad nga pirmeng giantos ni Manny matag hugna sa away, matagamtaman sab ni Jimuel.

Ingon niini kadako ang ilang gugma ngadto sa ilang anak. Ang pangutana: ‘Mapugngan kaha nila si Jimuel?