Adlaw karon sa managhigugmaay. Adlaw nga tingregalo’g mga bulak ngadto sa binuhat nga gimahal.
Adlaw nga ang mga restawran magsugwak sa mangaon. Adlaw nga ang mga sinehan linyahan. Ug adlaw nga mga sakyanan maglaray sa gawas sa motel, nagpaabot kinsay mogula kay sila na poy mosulod.
Ang bulak sama sa babaye. Sa higayon nga putlon ang sangang tul-id nga nagsapwang sa katahom sa mga kiyuom ug mobulag sa punoan nga maoy naghatag og kinabuhi, ang mga gihay hinayhinayng mangluspad, mangalarag hangtod mangalaya ug ilabay-dan-ok na lang sa daoban.
Ang mga kabakaba nga kusog kaayong maniba kanhi sa katam-is, dili na gyod mobalik-lingi panahon sa iyang pagkalawos. Kay didto na man tugpa ang mga pak-ang dukirok sa mga preskong gihay nga giumgan pa sa bugnaw’ng yamog sa kabuntagon.
Sanglit, matod pa sa usa ka higala kong writer: “Unsaon, Bay Javs, lami man gyod ang lab-as!” Porbida, no? Ingon ana ra diay kasayon ang pagkutlo og mga bulak? Mora mag susama sa panghitabo nga mabasa nato pirme sa sikat nga mga istorya sa Wildflower.
Bitaw. Pahinumdom lang sa mga Inday, labi nag mga batan-on pa, ning pagsaulog nato sa Valentine’s Day. Timan-i. Premarital sex is a mortal sin.
Dili gyod mahimuot ang atong Magbubuhat kon inyo ning buhaton samtang wala pa mahiusa ang duruha ninyo ka kasingkasing (sa imo ug sa imong uyab) atubangan sa altar sa kaminyoon.
Ayaw palingla sa katahom ug kamahalon sa bulak nga giregalo sa imong uyab, diin sagad adto mosangko sa pagpinarayganay sulod sa mabugnawng lawak ug mapusgay ang giampingang kaputli human manglugak ug lungkaba ang mga ali sa tam-is pasalig nga pulos ra diay bakak.
Pipila na ba ka dalaga ang nahimong inahan apan dili asawa? Pipila na ba ka binhi ang gitisok sa sabakan sa managhigugmaay panahon sa Valentine’s Day, diin pagkahimugso sa bag-ong kinabuhi, igo lang kining gisulod sa plastic bag ug gilabay sa basurahan kay walay ikabuhi ang estudyanteng girlfriend, kinsa gi-hit and run sa iresponsableng boyfriend?
Basta Valentine’s Day, tinghatag gyod og bulak ngadto sa linalang nga gihigugma. Apan kon dalaga ka pa, Inday, ug wala pa mahilabti sa panahon, please lang, ampingi intawon ang imong bulak.