Naila ang mga Pilipino sa pagkamaabi-abihon sa mga bisita ilabi na sa mga langyaw nga modayo dinhi sa Pilipinas. Dili lang ang mga Pilipino maoy nagsulti niini kondili ang mismong mga langyaw nga nakaduaw dinhi sa nasud.
Apan usa ka babayeng Chinese national ang wala tingali makabatyag sa maong pagkamaabi-abihon o basin nakamenus lang gyud sa mga Pilipino dihang iyang gisabligan og taho ang polis nga nagbantay sa MRT station sa Bonifacio Avenue sa Mandaluyong City pipila ka adlaw na ang nakalabay.
Ang hinungdan, wala siya pasudla sa polis samtang kini mosakay na unta sa MRT tungod kay nagdala kini og baso nga dunay taho.
Tungod ba kaha sa iyang kapungot o nakamenus gyud sa polis, iyang gisablig sa nawong sa maong polis ang iyang gibitbit nga taho ug gimakmak og kasaba ang maong polis.
Gidakop siya tungod sa iyang gibuhat ug ayha pa siya nakaamgo sa dakong sayop nga iyang gibuhat. Wala siya tugoti nga makasakay tungod sa higpit nga gipatumang seguridad nunot sa hulga sa terorismo ug mga pagpamomba.
Ang kapolisan nagdili sa mga pasahero pagdala og bisan unsang mga kargamento nga posibleng magdala og peligro sa kinabuhi sa mga pasahero.
Sa laktod pagkaestorya igo rang nagbuhat ang polis sa iyang trabaho. Gani gihangyo pa ang maong Chinese national nga giilang si Zhang Jiale, 42, nga nangangkong usa ka estudyante.
Dako kadto nga insulto sa polis ilabi na nga nag-uniporme kini ug insulto dili lang sa organisasyon sa kapolisan kondili sa tibuok katawhan Pilipino.
Ang maong langyaw naghilakhilak nga nangayo og pasaylo sa iyang gibuhat apan gipasakaan siya og kaso sa kapolisan ug gikasohan usab sa Bureau of Immigration tungod sa iyang kalapasan sa immigration laws.
Maleksyon unta ang mga langyaw dili lang mga Chinese sa maong insidente. Dili maayong abusohon ang pagkamaabi-abihon sa mga Pilipino.