Ang giidolo ug ang iyang mga tunob

Pebrero 10, 2019: Ikalimang  Domingo sulod sa tuig

MGA PAGBASA:   Is. 6;1-2,3-8/Sal. 138/1 Cor. 15;1-11/Lk. 5;1-11

Dunay kalainan kun maghisgot kita og pagsunod sa tawo ug ang pagsunod sa iyang mga tunob. Kun sundon nato ang tawo mahimong mokugi kita kun naa siya apan kun wala na, mawad-an pud kita og gana. Apan kun sundon nato ang iyang mga tunob bisan kun patay na siya padayon natong sundon ang iyang mga mithi. Kini ang kahulogan kun maghisgot kita og discipleship. Andam kitang mobiya sa bisan unsa nga atong nahuptan tungod ug alang sa maong mithi. Apil na niini ang pagbiya mismo sa atong kaugalingong seguridad. Ning paagiha kun sundon nato ang mga tunob sa Diosnong Magtutudlo, makita nato ang kalainan nga bisan kun physically wala siya apan pabilin siyang buhi diha sa atong mga kinabuhi ug binuhatan.