Nanghunaw karon si Public Attorney’s Office chief Persida Rueda-Acosta nga siya maoy hinungdan kun nganong daghan karon ang nangamatay tungod sa sakit nga tipdas (measles).
Si Acosta misumbalik hinuon og tumbok sa Department of Health sa maong measles outbreak kay matud pa niya pakyas ang ahensya sa kampanya sa pagpamakuna.
May punto si Acosta sa iyang pamasangil batok sa DOH kay ang mao mang ahensya ang gitahasan sa gobiyerno sa kampanya sa pagpamakuna. Sila usab maoy nanghatag adtong kontrobersiyal nga bakuna nga dengvaxia vaccines pangkontra sa sakit nga dengue.
Apan tungod sa pagtumaw sa isyu sa dengvaxia diin adunay pipila ka buok nga batang nangamatay pagkahuman nabakunahan niini, hasta ang ubang mga bakuna gikahadlokan na sa mga ginikanan.
Si Acosta maoy nangusog og maayo paggukod sa mga opisyales sa DOH bahin sa dengvaxia ay lagi matud pa nagtuo gyud siyang ang maong bakuna ang hinungdan sa kamatayon sa mga bata. Ang gobiyerno nakapalit og milyones dolyares nga kantidad sa dengvaxia gikan sa Sanofi Pasteur nga maoy manufacturer niini.
Ang mao usab nga pharmaceutical company maoy nakadiskubre ug nag-manufacture sa uban pang matang sa mga bakuna nga dugay nang gigamit sa DOH batok sa uban pang matang sa mga sakit nga ikamatay o ikabakol tibuok kinabuhi sa mga bata.
Sa dihang pwerteng inita sa isyu sa dengvaxia nga nasagolan og politika ug personal nga interes, matag-karon og unya nagsige kini og guwa sa mga balita ug bisan sa social media.
Kadungan sa matag gawas sa balita o mga posts sa social media ang dagway ni Acosta kinsa maoy giingong kampeyon sa mga biktima sa dengvaxia.
Mao nga dili gyud ikatingala nga siya maoy dali kaayong mapasanginlan niining outbreak karon sa tipdas.
Dili tuod siya maoy hinungdan kay di man siyay tigpamakuna, apan dili niya mahimakak nga tungod sa kasikas sa dengvaxia naamong ang ubang programa sa DOH sa pagpamakuna.