EDITORYAL - Reblocking sa wa pay sunog

Matag adunay mahitabong sunog sa mga residential areas daghan gyung kabalayan ang mangaugdaw hinungdan nga daghan ang mawad-an og panimalay.

Dinhi sa Metro Cebu, magtubagtubag lang ang sunog sa mga managsilingang siyudad. Gani niining bag-ohay lang, ang Cebu City ug Talisay City parehong naigo og sunog.

Sayo niining tuiga, may dakong sunog sab nga miigo sa Barangay Duljo-Fatima ug gitubag niadtong miaging adlaw sa sunog sa Barangay Ermita.

Gatosan gyud ka mga panimalay ang nangaugdaw ug apektado ang kaliboan ka mga indibidwal.

Sama sa mga nangaging katuigan, usa ray reklamo sa mga bombero niining mga dapit nga kanunay maigo sa sunog, huot ang agianan, walay kontrol sa mga tawo, layo kaayo ang fire hydrants ug sagad sa kabalayan sikit-sikit ug ginama sa mga gaay.

Ang kalayo importanteng elemento sa kinaiyahan ilabi na sa kinabuhi sa tawo kay makabuhi kini apan kun pasagdan makapatay usab kini.

Modako lamang ang danyos niini kun kini mapasagdan unya naa kanunay ang peligro sama sa nahisgutan sa ibabaw nga maoy reklamo kanunay sa mga bombero.

Dili man mahimong dili na pagamiton ang tawo og kalayo kay ikamatay kini. Apan kun ang kuhaon mao kining mga gireklamo sa kabomberohan, dili modako ang sunog sa usa ka lugar.

Usa sa hinungdan nga dili dayon makasud ang mga bombero mao kining mga gagmay nga karsada nga dili na kaagian tungod sa mga gipangtukod nga mga tindahan, lamesa-lamesa, mga bangko, gihimong parkingan sa trisikad, kariton, sakyanan, motor, ug mga basurang gitam-ok.

Dugangan pa ang mga tawong nagkarakara og hakot sa ilang mga butang, wala na gyuy kapaingnan ang mga bombero kondili ang pagpaabot nalang sa kalayo diha sa kinadul-ang pwesto diin sila nabara. Ang resulta daghan nang naugdaw.

Dili na unta paabuton pa sa mga barangay officials o ba kaha mismo sa mga kadagkoan sa siyudad nga dunay mahitabong sunog ayha pa mohimo og reblocking sa lugar.