Dihang nasudlan ang lungag

Kada adlaw adunay tawong mamatay. Usab duna poy mga bag-ong kinabuhi nga matawo. Apan mas daghan ang mogawas gikan sa sabakan kon ikomparar sa iluyong sa lubnganan.

Busa, dili kalikayan nga lakip ang mga sementeryo, gihimo nang balay sa mga buhi kinsa dili na masulod didto sa mga squatter areas timaan nga nagkaanam na gyud kadaghan ang namuyo-nanginabuhi dinhi sa dakbayan sa Sugbo.

Hasta mga bukid sa siyudad nga kaniadto ang mga labong punoan sa mga kakahoyan gihimong paraiso sa kalanggaman, karon gipulihan na sa mga konkretong mansiyon nga gipuy-an sa mga bulahang adunahan.

Kana lang dalan padulong sa amo, haskang daghanang subdibisyon nga akong maagian. Kini walay labot sa mga dato nga nag-iyahayg patukod og ilang kaugalingong higanteng balay daplin sa karsada nga igo lang masugatan og duha ka managtagbo nga sakyanan.

Ang good drainage importante gyung iapil pagdesayin diha sa tukorong konkretong pinuy-anan. Apan subo kaayong palandungon nga diha sa maong dapit, ang inagos sa hugaw’ng  tubig gikan sa naasoyng balay, mobuhagay gayud sa nagbahadang dalan ug adto matigom sa kinaubsan, diin ang yuta nga pirmeng gilubgan sa lim-aw, malungag ug mahimong dagkong libaong sa tantong agi sa nagkalainlaing sakyanan.

Sa walay pagpakabana sa namuyo sa maong balay, kutob sa molabay sa maong dapit, magbagulbol gyud. Giaspalto na baya ang naasoy’ng karsada. Apan wala abtig usa ka tuig, nangalungag lang gihapon! Unsaon, adto man gyod lugom ilang drainage.

Ultimong taxi drivers nangreklamo. Kay puwerte gyung gubaa sa karsada. Unya, taudtaod nang wala tagda sa atong gobiyerno. Hinungdan, nga nagkadaghan ang lungag nga makahayblad.

Pero, niadtong Miyerkules, Enero 30, alas 2:00 sa hapon, pag-agi namo sa maong dapit, may dump truck nga puno sa minasang aspalto ug nanapak ang mga sakay sa mga dagkong lungag.

Bisan mga libaong sa Horseshoe Drive, Upper Kalubihan ug ubang sudlonong dalan sa Guadalupe, gipanghungitan sab og init nga aspalto aron wala nay ligid nga mabuwasot.

Ug dihang nasudlan na og aspalto ang mga lungag, nakapangutana ang tanang lumolupyo kun kinsa bang politikoha ang nagpatrabaho niini? Unya, pagkasayod nila kun kinsa, nausa ilang hukom:

“Siya na ang atong botohan ning umaabot mid-term election.”