Kaso sa Goiter mitaas

Hilabihan ka bug-at ug dugoon ang mga panghitabo sa nakalabayng mga semana diin sunodsunod ang nahitabong pagpamatay.

Mosimang sa ta kadyot sa isyu sa panglawas nga murag wala naman kaayo mahisgoti.

Bitaw niadtong Biyernes gipahigayon ang culmination sa Goiter Awareness Week nga gipasiugdahan sa National Nutrition Council.

Matud sa pangulo niini nga si Dr. Parolita Mission nga nagsaka karon ang kaso sa goiter sa nasod.

Siyam sa matag usa ka gatos ka mga tawo sa nasud adunay goiter diin kaniadto aduna lay unom sa matag usa ka gatos ang naay goiter.

Ang isyu sa goiter talagsa ra kaayo mahisgotan bisan pa man og adunay mga tawong makita nfa naghambin niining balatian.

Siguro ang gi take for granted kini sa uban kay lagi dili man kuno dinalian, apan sayop kana nga panghunahuna tungod kay kun dili madali ang goiter, sama sa ubang balatian dako kining peligro sa panglawas sa mga tawo.

Ang uban nga adunay goiter, mahadlok magpa opera kay basin kuno og dili na makatingog ini’g human kay basin naay maputol nga mga nerve.

Pero sa ka high-tech na sa kahimanan karon wala nay angayan kabalak-an.

Gipanghimug-atan sa National Nutrition Council nga malikay sa goiter o prevention pinaagi sa pagmatngon sa pagkaon.

Una gikinahanglan nga iodized salt ang gamiton, ug ang pagkaon sa mga pagkaon nga adunay iodine sama sa mga pagkaon nga makuha sa dagat.

Dili na huwaton pa nga adunay goiter kun dili karon pa lang sundon nalang ang tambag sa mga eksperto sa panglawas basin pa diay mao kini ang makaluwas sa kinabuhi.