Yanong pahimangno

Pit Senyor! karong Domingo na gyud saulogon nato ang kapistahan sa Balaang Bata Senyor Sto. Niño de Cebu.

Dungan sa relihiyosong selebrasyon mao ang kulturahanong aspeto nga mao ang Sinulog festival diin highlight ang grand parade.

Giisip kini nga queen of all festivals sa nasod tungod sa ka grandiyoso niini nga dagsaon sa hilabihan ka bagang duot sa katawhan.

Busa hugot kaayo ang seguridad nga gipatuman sa tanang ahensya sa kagamhanan nga gitahasan sa pagpatuman sa kahapsay ug kalinaw.

Adunay mga higpit nga gidili sa atong mga kapolisan nga angayang tumanon sa katawhan.

Hasol man tuod alang sa uban apan angayan hunahunaon nga alang kini sa kaayohan kay kinabuhi ang nakapusta niini.

Sa pagsugod pa lang sa nobenaryo, gidili na ang pagdala sa backpack diin adunay mga nagbagotbot.

Natural ra man na nga naay moangal labi na nga wala masayod sa lagda apan wala na silay mahimo.

Kining pagwagtang sa signal sa komunikasyon atol sa fluvial procession, solemn foot procession ug sa grand parade seguradong anaa na usay moangal pero wala gihapon silay mahimo.

Kini gihimo aron maseguro ang kaluwasan sa mga tawo gikan sa posibleng paglihok sa mga dautang elemento.

Samtang pahimangno usab nga ayaw intawon ninyo dad-a ang mga mahalong butang sama sa alahas kay mao usab kana ang makapatintal sa uban nga makasala kay maibog man sila unya labnihon.

Kadtong mga ginikanan diha, kung mahimo ihigot ang mga bata sa inyong mga kamot o kaha kugoson gyud aron dili mawagtang.

Yanong pahinumdum lang gud kay basin sa tumang kahigwaos ug kalipay sa Sinulog aduna kitay mataligam-an nga mosangpot unya sa grabeng pagmahay.

Maayong pagsaulog sa Sinulog, Pit Senyor!