Pakpak ko sa plano sa kadagkoan sa Cebu Port Authority (CPA) sa pagpasud sa mga deboto ni Senyor Sto. Niño sa mga pantalan sa Dakbayan sa Sugbo aron pagsaksi sa mabulukon nga prosesyon sa kadagatan, ang tinuig nga pagbanhaw sa iyang pagdunggo sa Sugbo 498 ka tuig na ang nilabay, matag bisperas sa Piyesta Senyor.
Kay sa nangaging katuigan, ambot tungod ba sa seguridad o wa lang gyuy nagtagad sa pagsusi sa mga alternatibo, nagmingaw ang ubang mga pantalan samtang naghuot ang mga deboto sa Muelle Osmeña sa Lapu-Lapu City, Ouano Wharf sa Mandaue City ug Pier Uno sa Dakbayan sa Sugbo.
* * *
Ang pag-abli sa CPA sa mga pantalan makahatag og kahigayonan sa mas daghang deboto sa pagtan-aw sa usa sa labing mabulukon nga kalihokan sa piyesta Senyor.
Sa nangaging daghan na uyamot nga katuigan nahikawan sila tungod sa kakuwang sa luna nga kapahimutangan.
Ang naagian sa prosesyon sa mga pantalan sa Dakbayan sa Sugbo mao rang mga barko nga nagsilbato ug ang pipila ka tripulanteng nagwarawara.
Nga dakong baligho kay mao untay labing sadya kay mao may gidunggoan sa kasaysayan.
* * *
Nakamatngon ko sa kahinangop sa mga deboto sa kahigayonan nga makatan-aw sa kinatibuk-an nga fluvial procession, di lang sa putul-putol nang video nga mao ray napakita sa TV stations niadtong panahon nga wa pay FB Live, dihang among gipakita sa labing unang higayon sa DYAB live streaming ang live footage gikan sa ABS-CBN Sky Patrol nga ninunot sa galleon nga gisundan sa gatosan ka barko ug baruto.
Gipahibawo mi sa mga nagpuyo na sa ubang kanasuran nga nakahilak sila kay mao ‘toy labing unang higayon nga nabantang nilang katahom sa prosesyon nga wa silay kahigayonan pagtan-aw sa dinhi pa sa Sugbo.
* * *
Mahimong apiki nang panahon pagdapit sa mga deboto sa mga pantalan. Gawas nga may hulga nga makanselar ang fluvial procession kun ipaubos ang Sugbo sa Signal No. 1 sa pagsud sa bagyong Amang.
Apan sa mosunod nga kapiyestahan, nga hinaot maayo nang kahimtang sa panahon, saligi ang mga deboto ug ang batobalani sa gugma ni Senyor Sto. Niño sa paghimo sa mga pantalan nga laing higanteng bantawan sa lunsay nga pangilaba ug pagbalaan.
* * *