Human sa walo ka higayon nga pag-ubos sa presyo sa produktong petrolyo mugna sa nagbaha nga supply niini sa merkado sa kalibotan, ang mga sakop sa Organization of Petroleum Exporting Countries (OPEC) nagkasabot sa miaging semana nga laslasan ang gidaghanon sa lana nga ilang gibaligya sa merkado sa kalibotan aron mohunong na ang nagpadayon nga pagtibugsok sa presyo sa lana.
Ang mga sakop sa OPEC nagkasabot nga ilang laslasan og 1.2 milyones ka barel ang produktong petrolyo nga ilang gibaligya matag adlaw sa unang unom ka buwan ning tuig 2019.
Ang 15 ka mga nasud nga sakop sa OPEC cartel nagkasabot nga ilang laslasan og 800 mil ka bpd ang ilang output samtang ang Russia ug ubang mga oil producers motampo usab og 400 mil ka bpd.
Tungod niini, sugod niadtong Lunes mipatuman na og umento sa presyo sa ilang mga produktong petrolyo ang mga negosyante og lana dinhi sa nasud. Wala pa kini labot sa lain pang umento sa presyo nga ipatong sa matag litro sa produktong petrolyo tungod sa P2 nga excise tax nga ipatuman sa gobyerno sugod ning buwan sa Enero.
Gumikan niini, gisugyot ni Ilocos Norte Governor Imee Marcos nga umentohan ang ethanol nga isagol sa produktong petrolyo aron magpabilin ang ubos nga presyo sa lana.
Si Imee Marcos nagkanayon nga ang pag-umento sa gidaghanon sa isagol nga ethanol sa lana gikan sa 10 ngadto na sa 20 ka porsiyento momugna kini sa pag- ubos sa prisyo sa gasolina og P5 matag litro.
Dugang pa ni Marcos nga ang prisyo sa ethanol mas barato kay sa gasolina, busa ang pagsagol niini sa gasolina og 20 porsiyento makapaubos kini sa presyo sa gasolina og P20 matag litro.
Paminawon unta sa gobyerno ang sugyot ni Gobernador Imee Marcos kun gusto man kita og barato nga lana.