Daghang nagpabuto, may gidakop ba?

Sa naghinangat pa lang ang adlaw sa Bag-ong Tuig, mialarma na ang kadagkoan sa kapolisan ngadto sa publiko nga dakpon gyud nila ang masakpang magpabuto og mga rebentador aning mga adlawa.

Duna gyoy mga isog ug gahi’g ulo. Bisperas pa lang sa Bag-ong Tuig, misulaysulay nag pabuto sa  ilang kinartong napalit. Hinuon, off and on, binagsa ra tuod, pero dunay nagpabuto human sa pamahaw, paniudto ug labaw na tapos sa panihapon, diin mibukot  na ang kagabhion.

Samot na, pag-abot sa tungang gabii sa Bag-ong Tuig 2019, kay mora gyu’g gisangag sa nagkalainlaing matang sa kusog pabuto ug fireworks ang mga subdibisyon, nga ambot, wala man gyuy polis nga misulay pagsulod, uy, aron unta madakpan ning mga masinupakon sa balaod?

In fairness, sagad sa mga subdibisyon, ang nagpuyo puro professional ug edukado. Ug humok rang mosunod sa balaod.

Gawas lang kaha, kun may homeowners, nga mihimo sa iyang lote og squatter area kay naa gyuy kinaiya sa  eskuwater nga masagol. Kini ra ba sila, bisag lawom nang gabii, puwerting sabaa. Labi nag maoy padusliton sa mga pabuto! Haskang hawra. Murag maoy tag-iya!

Hinuon, dili na pareha kadaghan kaniadto o sa nanglabayng katuigan ang mipabuto. Segun sa matamatang kalkulasiyon, tingale may mga 15% lang sa tibuok subdibisyon ang nagpabiling badlongon. Nga sa ato pa, ubay-ubay gihapon ang walay tahod sa order ni  Pres. Duterte ug sa mga opisyal sa kapolisan nga maoy gipiyalan niining misyona panahon sa Pasko ug Bag-ong Tuig.

Luoy lang ang mga batang hadlok og pabuto. Kay bisag gipasul-ob nag headphone sa ilang parents, maigking gihapon ug mohilak taman sa ginhawa gumikan sa sipang butobuto sa Judas belt nga taas kaayo ang kutay sa daw makabungol nga kidlapkidlap sa kamangtas human dagkoti sa walay kaikog nga silingan.

Usab nag-ugtas ang mga law abiding citizens nga adunay sakyanan. Kay simbako uroy mapiksan sa splinter ang windshield sa ilang kotse, pwerteng problemaha?

Pipila sa mga badlongon, aduna gyuy nabuthan. Gibalita kini sa media, may video pa! Mga aggravating factors ug substantial evidences nga magtumbok nga sila wala mosunod sa Executive Order 28. Ang pangutana, may polis bang midakop nila? Tsip, ngano man ni?