Mogitib ra ang banagbanag
Dihang buwag nga gidagit sa armadong mga lalaki si Padre Rudy Romano sa Barangay Tisa ug aktibistang si Levi Ybañez sa downtown sa Dakbayan sa Sugbo niadtong Hulyo 11, 1985, way nahibawo sa mga nahadlok ug nasuko sa nahitabo nila nga mapukan sa mosunod nga pito ka buwan ang diktadurang nipahilom nila ug ubang nangahas pagbatok sa kahawod ni Ferdinand Marcos.
Way bisan usa sa mga gipatay, gibilanggo, gilugos ug giilogan og kabtangan sa diktadurang Marcos nga mapalayas siya sa Malakanyang 14 ka tuig human sa iyang pagdeklarar sa martial law.
* * *
Dihang giluba ang 17 anyos nga si Raul Pintoy sa bala nga nitusak sa iyang liog atol sa protesta sa tugkaran sa Kapitolyo sa Sugbo niadtong Mayo 19, 1984, lima ka adlaw human sa gitikas nga piniliay sa Batasang Pambansa, way nahibawo sa mga nalisang ug nasilag sa iyang pagkapukan nga kahinginlan ang diktadurang nipug-ok sa tingog sa katawhan sa nisunod nga duha ka tuig.
Way bisan usa sa mga politiko nga gitikasan ug gipatay ug mga botante nga gihudlat ug gipahilom nga makasalmot na og gawasnong piniliay 15 ka tuig human sa pagkatukod sa diktadura.
* * *
Bisan sa lapad nga mga protesta pagpangita og hustisya batok sa mga mamumuno ni Pintoy ug sa mga nidagit nilang Padre Romano ug Ybañez, way bisan usa nga nadakpan.
Bisan sa pagpanginlabot ni Pope John Paul II ug sa pagsugo sa Korte Suprema sa militar sa pagpakita nilang Romano ug Ybañez, way nahitabo.
Daghan ang nanghinaot apan wa bisan usa nga nahibawo nga ang nahitabo nilang Romano, Ybañez ug Pintoy ug ubang mg biktima sa diktadura nahimong pabilo sa lapad nga pag-alsa sa katawhan pagsakmit pagbalik sa ilang kagawasan.
* * *
Gipayongan ang Sugbo ug ubang bahin sa nasud og lapad nga dag-om sa kalibog ug kabalaka nga mahikawan na sab sa ilang kagawasan ang katawhan sa nanamilit nang tuig 2018.
Way bisan gamay’ng timaan nga masiak na ang kangiob karong bag-ong tuig.
Apan ang atong katiguwangan nga nakapuyo sa labing ngitngit nga katuigan sa atong kasaysayan wa sab mahibawo apan sa kapulihay nakasaksi sa paggitib sa banagbanag.
Mao nga angay lang nga magpabilin ta nga malaumon.
* * *
- Latest
