Masipang buto sa Pasko

Tungod sa hugtanong pag-implementar sa Executive Order 28: Providing for the Regulation and Control of the Use of Firecrackers and Other Pyrotechnic Devices, mimenos ang nangnegosyo niini ug midiyotay ang namalit, kinsa kanhi hilig modagkot og nagkalainlaing matang sa pabuto, diin bulan pa lang sa Septiyembre daw nag-indigay na kinsay ilhong hari sa pabuthanay.

Apan karon, diri sa amoa, wala na koy madungog nga magpabutog baby dynamite nga makauyog dili lang sa yuta, kondili, hasta sab sa dughan, sanglit kuyaw bayag mabuthan ang tawo niining mangtas nga pabuto, diin duha ray puntariyahan: tambalanan, o lubnganan?

Hinuon, sa mga inadlawng mantalaan, pirme tang makabalita nga halos kada adlaw aduna gyoy mga makalilisang butobuto sa nagkadaiyang dapit ning atong nasod bisan ning pagyukbo ta sa siyam ka kaadlawong Misa de Gallo.

Mga butobuto nga dili gikan sa gidagkotang taas nga kutay sa Judas belt, kondili, sa mga armas nga gikablit sa masuk-anong kamot nga wala na makaila unsa kabililhon ang kinabuhi nga giumol sa atong Magbubuhat?

Sa miaging pipila ka adlaw, nagkape lang si Deputy Chief Police Senior Inspector Porferio Gabuya didto sa usa ka kapehan sa National Highway, Guihulngan City, dihang gipaulanan siyag mga nagpangagot nga bala sa M-16 rifle gikan sa duruha ka masuk-anong anino nga nagsakay’g motorsiklo, kinsa pinaagi sa text message, matod pa sa kinatas-ang opisyal, mipaila sa kapolisan nga sila kunong rebelde maoy mibuhat sa maong krimen.

Sila gyod kaha?

Kon ang mga rebelde may pamilya nga gibiyaan sa patag, si Porferio aduna poy asawa’g mga anak nga gitalikdan sa dayon.

Ang dugo nga naglatay sa kaugatan sa mga NPA sama ra sa dugo nga mibuhagay gikan sa nalungag nga lawas ni Porferio – pulos dugong tabonon.

Unya, nganong di man magkahiusa?

Di ba, misaad-tanyag man si Tatay Digong nga kon malinawon lang nga mosurender ang mga rebelde, hatagan silag desenteng kapanginabuhian?

Kaanindot kaha kon dawaton kini sa atong mga kaigsoonan nga nagpabukid.

Kaanindot kaha, kon ang mga butobuto nga gipuy-an nila diha sa kangitngit, mahunong na.

Ug mapulihan sa masipang buto sa kahayag, kalinaw, gugma ug panagdait nga maoy gusto sa Ginoo nga saw-an natong tanan niining Paskoha.