Manggihatagon

Nindot kaayo ang giandam nga resolusyon ni Cebu City Councilor Eugenio Gabuya Jr. nga did-an na gyud ang mga mag-drive og besikleta nga motuman sila sa lagda sa trapiko.

Nakabantay man gud si Konsehal Jun Gabuya nga sagad gyud sa mga magbisekleta motabok lang gihapon sa karsada bisan og stop pa ang signal light.

Husto gyud si Gabuya nga kining mga seklista angay’ng badlungon gyud sa mga traffic enforcers aron nga motahod sila traffic signal.

Dili gyud angay nga ikasuko kini sa mga hingtungdang seklista kay ang tumong ni Gabuya niini mao nga sila dili mameligro.

Kuyaw man gud kaayo nga ang maong mga seklista madasmagan kay mopadagan ra man gihapon tabok sa karsada bisan stop na ang signal.

Bisan ang mga ordinaryong motorista nga nagtuman sa balaod kuyaw kaayo nga makadasmag niining maong magpataka lang paglabang.

Husto kaayo ang gisugyot ni Gabuya ngadto sa CITOM nga kinahanglang badlungon sa mga traffic enforcers ang mga magsakay og bisekleta nga dili motuman sa traffic signal lights.

* * *

Naabereya gyud ang akong sakyanan kagahapon sa Imus Street ilawom gyud sa skywalk. Pwerteng ulawa gyud nako kay dili na man gyud modagan ang sakyanan tungod sa pagbuto sa rubbercup sa clutch.

Abtik ko nga nanaog sa sakyanan ug gidumala aron dili makamugna og grabeng traffic ang pagkaaberiya sa akong gisakyan.

Sa samang higayon, gikontak ko dayon si Bro. Isko Ouano nga maoy operations chief sa CITOM aron nga maguroy ang akong sakyanan ngadto sa dapit nga dili makabalda sa trapiko.

Human makontak nako si Isko Ouano, gikontak ko usab dayon ang akong mekaniko aron maatiman ang naguba nakong sakyanan.

Ingon usab unta niini ang himoon sa uban kon makasinati kamo nga maaberiya ang inyong sakyanan. Kini aron nga ang nahitabo sa atong sakyanan dili makamugna og grabeng trapiko.

Salamat sab kaayo sa mga sakop sa CITOM nga  abtik kaayong miresponde ug mitabang kanako. Maayong pasko kaninyo.

* * *

Daygon nako kadtong mga tawo nga mipahat sa ilang mga nahuptang grasya ngadto sa mga nanginahanglan nga ubos ra kanila og kahimtang.

Kini maoy hinungdan nga bisan sa akong pagka pobre, mogahin gyud ko og bisan gamay ngadto sa mga ubos pa nako og kahimtang.

Ang tinuod, may mihatag nako og pinaskohan nga pulos gyud tag P50 nga tuskig kaayo.

Wala gyud nako kini gastoha kay ako ra usab kini nga ihatag sa mas ubos pa kanako nga wala gyud tawon makadawat og pinaskohan. Sa ingon nga paagi, malipayon na ko niini.