Erik Espina

Hangtud sa atong pagsulat niini, wala pay katinuan kun si kanhi Konsehal Erick Espina dili na ba gayud modayon paglansar pagka-Konsehal sa dakbayan sa Sugbo. Sa iyang pag-resign, iya usab gipahibawo nga dili na siya modayon paglansar, apan, wala niya ibutyag ang hinungdan.

So, alang niadtong mobotar unta kaniya sa Mayo 13 nga eleksyon, nagpabilin kining misteryo.

Sa kampo ni Vice Mayor Edgar Labella ug iyang kahigalaan, adunay mga tinguha ug paningkamot pag-persuade ni Erik pag-usab sa iyang desisyon pagsibog sa iyang kandidatora.

Sa akong nadunggan, tingali adunay gipangluoran si Erik, ug lagmit isip dili politiko ug labaw pang dili traditional politician (Trapo), dili siya makasugakod kun unsa man nga  mga intriga ug mga political skirmishes nga iyang masugatan, labi na ini’g sugod na unya sa kampanya. Atong amigo, si Atty. Aven Piramide, namahayag nga bisan og  wa kaayo siya personally makaila ni Erik, mobulontaryo siya pagtabang  sa kampanya kun modayon si Erik paglansar. Matud niya, iyang nakita ang katarong ug kalantip sa salabutan  ni Erik. Sa ato pa, qualified kaayo nga molingkod diha sa Konseho sa Sugbo.

Sa nakaila ni kanhi Senador ug SSS Administrator Rene Espina, makaingon kita nga si Erik nagagikan sa ligdong nga banay ug wala niya mansahe ang ngalan niini. Mausab kaha ang hunahuna ni Erik?

* * *

Ang National Citizens’ Movement for Free Elections (Namfrel) mipadayag sa ilang pagsupak sa pagwagtang sa term limits sa mga magbabalaud, sumala sa draft federal constitution nga gihan-ay sa House of Representatives (HOR).

Sa ato pa, buot sa mga magbabalaud nga patuyangan sila sa ilang paglingkod diha sa Kongreso ug dili limitahan pila ka tuig ang ilang pag-alagad. Ngiga nila no?

Laing gisupakan sa Namfrel mao kining pagpapas sa anti-dynasty provision nga gisugyot sa Consultative Committee (ConCom) ang gitahasan ni Presidente Digong Duterte pag-review sa  1987 Constitution ug pag-draft sa bag-ong federal constitution.

Nasayran nga ang draft nga gihimo sa HOR lahi kaayo sa draft constitution nga gihimo sa ConCom.  Among others, laing gisupakan mao ang provision nga maghatag og gahum sa Kongreso “to allow foreign ownership of land, educational institutions and media companies.” Alang sa mga misupak niini, medyo kuyaw ni. Imagine, ang mga langyaw na unya ang manag-iya sa atong kayutaan dinhi, ug modominar sa atong educational system ug sa pamatigayon sa media.

Unsa kahay dangatan sa atong nasud kun pasagdan lang ang atong mga sakop sa Kongreso nga maoy mopanday sa bag-ong federal constitution pinaagi sa Con-Ass?