Kausaban

Disyembre 9, 2018: Ikaduhang Domingo sa Adbiyento

MGA PAGBASA: Bar. 5;1-9/Sal. 126/Fil. 1;4-6,8-11/Lk. 3;1-6

Kini ang mensahe ni Juan Magbubunyag. Kasagaran sa Ikaduhang Domingo sa Adbiyento siya gyud ang mogawas ingon nga bida ning maong Domingoha. Ang kausaban sa kasingkasing mao man ang mas mahinungdanon kaysa bisan unsang dekorasyon. Mahinulsulong kasingkasing ug mapaubsanong espiritu kini gyud unta ang angayan natong buhaton aron mas malipay ang Ginoo ning panahon sa Pasko sa iyang pagkatawo. Ang pagkumpisal dinuyogan ang ritwal sa kabag-ohan mao man ang makapahimo ning panahona nga sama sa insenso nga mahimo natong ihalad alang sa Ginoo. Ug kun buot kitang mausab ang kinatibuk-an sa atong katilingban mas labing maayo tingali nga magsugod kita mismo sa atong tagsa tagsa ka mga kaugalingon.