Gihulagway nga malampuson ang unang state visit sa presidente sa China dinhi sa Pilipinas. Atol sa maong higayon 29 ka mga kasabutan ang gipirmahan nilang Chinese President Xi Jinping ug Presidente Rodrigo Duterte.
Apil niini ang kasabutan alang sa panagkumbuya sa duha ka mga nasud sa pagpangita og tinubdan sa lana, pagpalambo sa pagtinabangay sa duha ka mga nasud sa natad sa edukasyon, teknolohiya, imprastraktura, ug daghan pa.
Samtang mapasigarbohon ang administrasyong Duterte niini, daghan sab ang nabalaka unsay detalye sa maong mga kasabutan.
Kini tungod kay way kopya sa maong mga dokumento nga gipakita ang Malakanyang ngadto sa publiko.
Nunot niini nanawagan si Bise Presidente Leni Robredo nga ipakita sa Malakanyang ang unod sa tanang kasabutan nga gipirmahan aron masiguro nga way interest sa nasud ug sa katawhang Pilipino ang nakompromiso.
Ang tigpamaba hinuon sa Malakanyang nga si Salvador Panelo mipasalig nga ilang ipakita sa publiko ang mga detalye sa 29 ka mga kasabutan.
* * *
Sa mga kalihukan atol sa pagduaw sa presidente sa China dinhi sa Pilipinas wala kalikayi nga mabantayan nga daw sa gihimo gyud sa Malakanyang ang tanan aron likayan nga masilo ang bisita.
Sa tinguha sa Malakanyang nga matagbaw ang lider sa China gisakripisyo niini ang pipila ka mga protocol.
Usa sa nabantayan nga wala sunda sa Malakanyang mao ang protocol sa paggamit sa atong Bandila. Gitumbok sa historical researcher nga si Eufemio Agbayani III nga gilapas sa Malakanyang ang Republic Act 8941 o ang mas naila nga “The Code of the National Flag, Anthem, Motto, Coat-of-Arms and Other Heraldic Items and Devices of the Philippines.”
Ang Section 18 sa maong balaod nagkanayon nga kun ang atong Bandila iparada uban sa han-ay sa mga bandila sa laing nasud, kinahanglan nga ang atong bandila mahimutang sa wala nga habig.
Apan bali ang nahitabo atol sa pagbisita ni Xi.