Tikas sud sa Larsian

Human sa tulo ka buwan nga renovation, gibuksan na pagbalik sa Kapitolyo ang sikat nga food strip sa uptown nga mao ang Larsian.

Atol sa pormal nga pagbukas niadtong Biyernes gipasalig sa manager nga si Joey Herrera nga istrikto ang ilang mga lagda pagsiguro nga luwas ug limpiyo ang mga produkto nga gibaligya sulod sa Larsian.

Hugot sab ang ilang mga lagda batok sa mga tikasan nga tindahan.

Apan dili igo ang pasalig. Kinahanglan ang hugot nga pagpatuman sa lagda ug pagsiguro nga way usa sa mga tag-iya og tindahan sulod sa Larsian ang magpasuwabi sa pagpanikas sa mga inosenteng customer.

Pipila ka adlaw sa wala pa pormal nga gibuksan ang Larsian, diha nay reklamo sa pagpanikas.

Usa ka editor sa mantalaan ang mireklamo kay gipabayad sila og sobra kay sa kantidad sa ilang gikaon.

Nahibulong ang editor kay labihan mang dakoa sa ilang nabayran hinungdan nga nangayo siya og subay.

Apan sa dihang gipangayoan og subay nasuko hinuon ang mga tagdumala sa kan-anan ug mitanyag nga iuli ang bayad.

Dihang gipugos gyud sa editor pagpangayo ang kwentada, nabuking nga gipaburot og maayo ang ilang sumada.

Dili ni unang higayon nga nahitabo sulod sa Larsian. Kaniadto nakasinati pud mi og ingon niini.

Nabantayan hinuon dayon namo ang pagpanikas tungod kay labihan man ka kutihan sa akong asawa.

Gitagsatagsa man niya og susi ang lista sa among order hinungdan nga iyang nabantayan nga dunay mga gilista nga way apil sa among order.

Sa among kwentada misobra og kapin sa P200 ang ilang sumada sa aktwal namo nga gikaon.

Kun dili pa kutihan ang akong asawa posibli nga nakabayad mi nga way kalibutan nga nabiktima na diay sa tikas.

Pila man kaha ka buok sa mga mokaon diha sa Larsian ang magkugi gyud sa pagsusi?

Dali hinuon nga giaksiyonan sa Kapitolyo ang reklamo sa usa ka editor. Gi-ban dayon nila ang tindira nga responsabli sa tikas.