EDITORIAL - Delicadeza pangitaon kaayo

Misibaw og maayo ang panawagan nga patas-an o higpitan pa gyud ang rekisitos sa mga gustong mokandidato sa mga eleksyon sa local ug nasudnong posisyon sa gobiyerno. Sa pagkakaron, ang edad lamang ang managlahi sa rekisitos sa gustong modagan pagka pangulo sa nasud, bise presidente, senador ug kongresista.

Apan ang ubang rekisitos parehas ra tanan sama sa: natural born Filipino; makamaong mobasa ug mosuwat, rehistradong botante sa lugar diin sila mokandidato ug kinahanglang nakapuyo og usa ka tuig sa dapit diin sila mokandidato.

Maayo unta og iapil sa rekisitos nga ang mga mokandidato kinahanglang walay pending nga kaso ilabi na kon nalambigit sa kurapsyon ug kasong kriminal.

Apan kining maong sugyot nga dugang rekisitos imposible gyung itugot, kay kon kini tugotan, daghang mga kandidatong niduso og certificates of candidacies alang sa mid-term elections sa 2019 ang di makapasar.

Sa pagkakaron daghan ang mga naa sa posisyon nga walay kabangkaagan sa ilang trabaho apan nagdawat og dagkong sweldo samtang duna say uban ang nalambigit sa kurapsyon samtang sila naglingkod ug posibleng ilaha gihapon kining usbon kon makadaog pagusab.

Nakadaog lamang sila tungod sa ilang kasikat o ba kaha tungod sa ilang apelyido kay anak, kapikas , pag-umangkon o apo sa usa ka beteranong politiko ug labaw sa tanan may kwarta silang ikapamalit og botos.

Gawas pa niana, adunay mga politiko nga nagpatong-patong na ang mga kaso ug duna pay uban nga nakombikto na gyud sa ilang mga kaso kay kun wa pa moapelar toa na unta sa prisohan.

Apan midagan gihapon karon sa pamasin nga makadaog o masublian og mandato sa katawhan.

Usa ra gyuy kuwang aning mga kandidato nga may mga kaso nga padayong nagpapili, wala silay delicadeza ug kaikog sa mga botante.

Sila kadtong taas kaayo og bilib sa ilang kaugalingon nga nagtuong wala nay laing makapamuno sa mga konstituwente sa ilang dapit kondili sila lamang.