Nakaginhawa og dyutay ang mga motorista sa daku-dako nga pagkunhod sa presyo sa krudo ug gasolina niadtong Martes. P2.30 maoy labing daku nga pagkunhod sa presyo sa gasolina matag litro samtang P2 ang krudo.
Apan bisan niini, pabilin ang taas nga presyo sa mga nag-unang panginahanglan sa katawhan sama sa pagkaon. Wala say kasegurohan hangtud asa kutob ang pagminus sa presyo sa krudo ug gasolina. Busa gikinahanglan ang maluntarong epekto sa pagminus sa presyo.
Usa sa mga sugyot nga daku og ikatabang aron moubos pa ang presyo dili lang sa gasolina kun dili lakip na sa batakang panginahanglan mao ang pagtangtang sa value added tax sa pagkaon, gasolina ug electricity.
Kun dili man mahimo nga wagtangon sa hingpit, bisan suportahan nalang sa gobiyerno ang sugyot ni Ilocos Norte Governor Imee Marcos nga ipatuman ang usa ka tuig nga suspension sa VAT samtang nagping-it pa ang publiko sa epekto sa taas nga inflation rate.
Mamahimong namolitika si Marcos sa maong sugyot sanglit kandidato man siya pagka-senador sa umaabot 2019 elections apan mas importante pa gihapon ang dakung benepisyo nga matagamtaman sa mga kabus kay sa unsa may nagpahipi niyang motibo.
Sigun ni Marcos, inay ipatuman sa gobiyerno ang VAT mas maayong hingusgan sa Department of Finance ang pagkolekta sa income tax. Iyang gibana-bana nga makatigum ang gobiyerno og P362 bilyones gikan sa income tax kun tarungon lang kini sa pagpangolekta.
* * *
Nakamugna og kontrobersiya ang tinguha ni Mayor Tomas Osmeña nga kadto nalang mga polis nga molopyo ug rehistradong botante sa siyudad ang hatagan og allowance sugod sunod tuig.
Ang kadagkuan sa kapolisan nihulagway niini nga pamolitika ug gitumong batok ni Cebu City Police Office director, Senior Supt. Royina Garma.
Atong lingi-on unsa bay lintunganay nganong mohatag og allowance ang dakbayan sa mga polis nga nadestino sa CCPO. Dili ba tungod kay sila nitabang sa pagpatuman sa kahapsay ug kalinaw sa dakbayan?
Dihang gisugdan ang pagpanghatag og allowance wala malakip sa qualification ang pagkaresidente ug pagkabotante, nganong kalit lang ni nga giusab sa mayor?
Dili tingale makiangayon alang sa mga polis nga nagserbisyo dinhi sa dakbayan kun sila hikawan sa maong benepisyo tungod lang kay dili sila botante. Di personal nga kwarta ang gigamit sa dakbayan pagpanghatag og allowance busa angayang patas ug way pili-on ang hatagan sa benepisyo.